کے پی میں امن کی ذمہ داری علی امین گنڈا پور ،جیل میں بیٹھے انکے لیڈر کی ہے’ عظمیٰ بخاری

عہدے وسائل سب کے پاس ہیں،کے پی میں کرم و پارہ چنار سکیورٹی حالات ٹھیک نہیں ہو رہے
لاہور ( ڈیلی پاکستان آن لائن) وزیراطلاعات پنجاب عظمیٰ بخاری نے کہا ہے کہ کے پی میں امن کی ذمہ داری وزیر اعلیٰ خیبر پختونخواہ علی امین گنڈا پور اور جیل میں بیٹھے ان کے لیڈر کی ہے،عہدے وسائل سب کے پاس ہیں،کے پی میں کرم و پارہ چنار سکیورٹی حالات ٹھیک نہیں ہو رہے،پنجاب کے عوام فتنہ اور احتجاج کی سیاست کو سپورٹ نہیں کرتے۔ان خیالات کا اظہار انہوں نے لاہور میں پریس کانفرنس کرتے ہوئے کیا ۔ وزیراطلاعات عظمیٰ بخاری نے کہا کہ 2024ء پنجاب کے عوام کیلئے اچھا ثابت ہوا۔ پنجاب میں مریم نواز کا حکومتی معاملات چلانے کا سال مکمل ہونے والا ہے،میرے پاس پچھلے 10 ماہ کا رپورٹ کارڈ موجود ہے، کہا تھا وزیراعلی مریم نواز کے اقدامات فائلوں کیلئے نہیں ہیں۔یہ سال عوام کو بہت سے خوشخبریاں دے کر جائے گا، سٹاک ایکسچینج میں 1400پوائنٹس کا اضافہ ہوا ہے، مہنگائی اس وقت 4اور 5فیصد کے درمیان موجود ہے، مریم نواز کے لئے یہ سال اہمیت کا حامل ہے، وزیراعلی مریم نواز کے پاس پہلے کبھی حکومتی عہدہ نہیں رہا، وزیراعلی مریم نواز کیلئے یہ ایک نیا تجربہ تھا۔انہوں نے کہا کہ وزیراعلیٰ پنجاب نے ثابت کیا کارکردگی کیلئے یہ ضروری نہیں کہ کتنی باری ہے، کارکردگی ثابت کرنے کیلئے اہل ہونا ضروری ہے، خیبرپختونخوا میں بھی ایک حکومت ہے، کرم اور پاراچنار کے حالات سب کے سامنے ہیں، کرم اور پاراچنار کی سڑکیں کھلوانا گنڈاپور کا کام ہے، حالات خراب کرنے کی سیاست کو پنجاب کے عوام سپورٹ نہیں کرتے۔انہوں نے کہا کہ پنجاب میں 64لاکھ خاندانوں کو گھر کی دہلیز پر رمضان پیکیج دیا گیا، لوگوں کے گھروں تک عزت کے ساتھ رمضان پیکیج پہنچا، تاریخ میں پہلی بار پنجاب میں روٹی کی قیمت متعین کی گئی، وزیراعلی مریم نواز نے ایئرایمبولینس شروع کی، ایئرایمبولینس والی بات پر بہت سے سیاسی غریب اور یتیم آ گئے تھے۔صوبائی وزیر کا کہنا تھا کہ پنجاب میں 27ہزار طلبہ کو الیکٹرک بائیکس میرٹ پر تقسیم کی گئیں، الیکٹرک بائیکس کی تعداد کو بڑھا کر ایک لاکھ کر دیا گیا، سکالرشپس کی تعداد بھی 50ہزار کر دی گئی ہے، 2ماہ کے بجلی بلوں میں 54ارب روپے کا ریلیف پنجاب کے غریب لوگوں کو دیا گیا۔عظمیٰ بخاری نے کہا کہ نیوٹریشن پروگرام کا آغاز غذائی قلت کے شکار بچوں کیلئے کیا گیا، سکولوں کی ری آرگنائزیشن شروع کی گئی ہے، نئے سکولوں کی تعمیر نو، نئی نرسری اور بوٹی مافیا کا خاتمہ ہوا ہے، ہم نوجوانوں کو شرمز فارمنگ کیلئے آسان قرضے دیں گے، بہت سارے ملک ہیں جنہوں نے شرمز فارمنگ سے بہت سارا زرمبادلہ کمایا۔انہوں نے کہا کہ اپنی چھت اپنا گھر سکیم میں لوگوں کو 15لاکھ روپے تک آسان اقساط پر قرض دیئے ہیں، اس وقت سیکڑوں کی تعداد میں اپنی چھت اپنا گھر سکیم کے تحت گھر بن رہے ہیں، نواز شریف آئی ٹی سٹی کا قیام کرنے جا رہے ہیں، بڑی بڑی آئی ٹی کمپنیوں کے ساتھ بات چیت جاری ہے۔وزیراطلاعات نے کہا کہ لاہور میں ایک ہزار بیڈ کا نوازشریف کینسر ہسپتال بھی بننے جا رہا ہے، چائنہ کے ساتھ ایم او یو سائن ہو گیا ہے، نواز شریف کینسر ہسپتال پر 54ارب روپے کی لاگت آئے گی، پنجاب میں خصوصی بچوں کو 10ہزار کی مالی مدد مل رہی ہے۔