کوئی مذاکراتی عمل صدر زرداری کی سرپرستی کے بغیر کامیاب نہیں ہو سکتا’گورنر پنجاب

سیاسی کشیدگی کا خاتمہ ملکی استحکام کیلئے ناگزیر ہے ‘سردار سلیم حیدر خان کی پریس کانفرنس
لاہور ( ڈیلی پاکستان آن لائن)گورنر پنجاب سردار سلیم حیدرخان نے کہا ہے کہ کوئی مذاکراتی عمل صدر زرداری کی سرپرستی کے بغیر کامیاب نہیں ہو سکتا،سیاسی کشیدگی کا خاتمہ ملکی استحکام کیلئے ناگزیر ہے ، مری ایکشن کمیٹی کے مطالبات وزیر اعلی کی توجہ کے طالب ہیں ۔یہ بات انہوں نے گورنر انیکسی راولپنڈی میں مری ایکشن کمیٹی کے عہدیداران کے ہمراہ پریس کانفرنس کرتے ہوئے کہی۔گورنر پنجاب سردار سلیم حیدر خان نے کہا ہے کہ پی ٹی آئی سمیت کسی سے بھی مذاکراتی عمل کو کامیاب بنانے کیلئے صدر آصف علی زرداری کی سرپرستی ناگزیر ہے کیونکہ وہ مذاکرات کے بادشاہ ہیں اور یہ سسٹم صدر زرداری کی دانش کی بدولت ہی کامیابی سے چل رہا ہے۔اُنہوںنے کہا کہ پی ٹی آئی سے مذاکرات خوش آئند ہیں اور ملک میں استحکام کیلئے ضروری ہے کہ تمام سیاسی قوتیں ایک جگہ اکھٹی ہوں۔ گورنر پنجاب نے کہا کہ مذاکرات کے عمل سے ملک میں کشیدگی کو ختم کیا جا سکتا ہے کیونکہ ملک کسی بھی صورت اس کا متحمل نہیں ہو سکتا۔اُنہوں نے کہا کہ ن لیگ اور پی پی پی دریا کے دو کنارے ہیں جن کا اتحاد ملکی مفاد کے تحت قائم ہے اور یہ نظریاتی طور پر دونوں الگ الگ جماعتیں ہیں۔ گورنر پنجاب نے مزید کہا کہ مری کے رہائشیوں کے مسائل وزیر اعلی تک پہنچائیں گے اور مری ایکشن کمیٹی کے مطالبات وزیر اعلی کی توجہ کے طالب ہیں۔اُنہوں نے کہا کہ مری کے لوگوں کی بات سننے کی بجائے ایف آئی آر درج کی گئی ہیں جو کسی بھی صورت قابل قبول نہیں ہے۔گورنر پنجاب نے کہا کہ مری میں روڈز کو کھلا کریں مگر سو سال سے موجود لوگوں کو باہر نہ پھینکیں اور قانون اور ضابطے کے تحت مری کے لوگوں کے مسائل حل کئے جائیں۔