چین میں پھیلنے والا ہیومن میٹا نیومو وائرس 2دہائیوں سے پاکستان میں موجود ہے’ قومی ادارہ صحت

اسلام آباد(ڈیلی پاکستان آن لائن ) قومی ادارہ صحت کی جانب سے کہا گیا ہے کہ چین میں پھیلنے والا ہیومن میٹا نیومو وائرس 2دہائیوں سے پاکستان میں موجود ہے۔قومی ادارہ صحت اسلام آباد کے مطابق ایچ ایم پی وی کی پاکستان میں پہلی دفعہ تشخیص 2001 میں ہوئی تھی، 2015 میں ہیومن میٹا نیومو وائرس کے پمز اسلام آباد میں 21کیس سامنے آئے تھے۔این آئی ایچ حکام کے مطابق عالمی ادارہ صحت نے فی الحال ایچ ایم پی وی کے حوالے سے کوئی ایڈوائزری جاری نہیں کی ہے، چین میں ایچ ایم پی وی کی صورتِ حال پر این سی او سی کا اجلاس منگل کو ہو گا۔حکام قومی ادارہ صحت کے مطابق پاکستان میں اس وقت موسمی انفلوئنزا، خاص طور پر انفلوئنزا اے اور بی کے کئی کیسز سامنے آ رہے ہیں۔دوسری جانب طبی ماہرین کا کہنا ہے کہ ایچ ایم پی وی کے کیسز اکثر اوقات سامنے آتے رہتے ہیں۔