چینی زبان میں مہارت کیلئے پاکستان میں ایکسیلنس سینٹرز قائم کرنے کا فیصلہ

اسلام آباد( ڈیلی پاکستان آن لائن )چین جدید تکنیکی و پیشہ ورانہ تربیت اور چینی زبان میں مہارت فراہم کرنے کیلئے پاکستان میں22سے زائد ایکسیلنس سینٹرز قائم کرے گا۔ نیشنل ووکیشنل اینڈ ٹیکنیکل ٹرینگ کمیشن پاکستان اور چین کے ٹینگ انٹرنیشنل ایجوکیشن گروپ کے مابین مفاہمتی یادداشت پر دستخط کر دیئے گئے۔ پاک چین انڈسٹریل سینٹرز آف ایکسیلنس کے قیام کے لیے وفاقی وزیر برائے تعلیم اور پیشہ ورانہ تربیت ڈاکٹر خالد مقبول صدیقی کی ہدایت پر اس مفاہمتی یادداشت پر دستخط کرتے ہوئے اس عزم کا اعادہ بھی کیا گیا کہ دونوں ملک و ترقی کے سفر میں ایک دوسرے کا بھرپور ساتھ دیں گے۔ اس منصوبے کا مقصد ایک ہنرمند افرادی قوت تیار کرنا ہے جو جدید صنعتوں کے تقاضوں کو پورا کرے اور پاک چین تعاون کے ذریعے جدت کو فروغ دے۔