پنجاب میں پتنگ بازی ناقابلِ ضمانت جرم قرار، 7سال تک قید ہوگی

لاہور ( ڈیلی پاکستان آن لائن)پنجاب میں پتنگ بازی پر مکمل پابندی عائد؛ خلاف ورزی پر سخت سزائیں ہوں گی۔ ترجمان محکمہ داخلہ پنجاب کے مطابق پنجاب اسمبلی نے پتنگ بازی پر مکمل پابندی کا بل منظور کر لیا،پنجاب میں پتنگ بازی کی ممانعت کا ترمیمی ایکٹ 2024منظور کیا گیا جس کے تحت پنجاب میں پتنگ بازی ناقابل ضمانت جرم قرار دیا گیا ہے،خلاف ورزی پر کم از کم 3سال سے 7سال تک قید کی سزا ہوگی، پتنگ بازی، تیاری، فروخت و نقل و حمل پر 5لاکھ سے 50لاکھ تک جرمانہ ہوگا۔ پابندی کا اطلاق پتنگوں، دھاتی تاروں، نائلون کی ڈوری، تندی، پتنگ بازی کے مقصد کیلئے تیز دھار مانجھے کے ساتھ تمام دھاگوں پر ہوگا۔پتنگ بازی سے متعلقہ مواد کی تیاری اور نقل و حمل پر مکمل پابندی ہوگی۔ ترجمان محکمہ داخلہ کے مطابق پتنگ اڑانے والے کو 3سے 5سال قید یا 20لاکھ جرمانہ یا دونوں ہوں گے، پتنگ ساز اور ٹرانسپورٹر کو 5سے 7سال قید یا 50لاکھ جرمانہ یا دونوں ہونگے، پتنگ بازی میں ملوث بچے کو پہلی بار 50ہزار جرمانہ، دوسری بار 1لاکھ جرمانہ ہوگا۔ ترجمان محکمہ داخلہ پنجاب نے کہا کہ پتنگ بازی کے دوران تیز دھار ڈور کے استعمال سے کئی قیمتی جانوں کا ضیاع ہوا، انسانی جانوں کے تحفظ کیلئے پتنگ بازی ہر مکمل پابندی کا قانون منظور کروایا گیا۔