پنجاب میں معدنیات کی حفاظت کیلئے منرل گارڈز کی تعیناتی کا فیصلہ

معدنیات کی برآمدات بڑھانے کیلئے منرل پراسیسنگ زون کا قیام عمل میں لایا جا رہا ‘وزیر معدنیات
لاہور ( ڈیلی پاکستان آن لائن) صوبائی وزیر معدنیات شیر علی گورچانی نے کہا ہے کہ پنجاب میں معدنیات کی حفاظت کیلئے منرل گارڈز تعینات کئے جائیں گے، معدنیات کی برآمدات بڑھانے کے لئے منرل پراسیسنگ زون کا قیام عمل میں لایا جا رہا یے جہاں پر سرمایہ کاروں کو مراعات دی جائیں گی تاکہ ہماری برآمدات بڑھ سکیں۔ انہوں نے کہا کہ خام پنک سالٹ کی درآمد پر پابندی لگائی جا رہی ہے تاکہ ہمارا پنک سالٹ ضائع نہ ہو۔ اس سالٹ سے مختلف چیزیں بنا کر ایکسپورٹ کی جائیں گی۔ پنک سالٹ کے حوالے سے جاری شدہ لائسنس کی شرائط پر جو پورا نہیں اتریں گے ان کے لائسنس کینسل کر دیئے جائیں گئے۔ اس موقع پر وزیر قانون و سی اینڈ ڈبلیو ملک صہیب احمد بھرت نے کہا کہ معدنیات کی چوری کو روکنے کیلئے مخصوص روٹس مقرر کئے جائیں۔ مخصوص روٹس سے سڑکیں ٹوٹ پھوٹ کا شکار ہونے سے بچ جائیں گی۔ ڈویڑن کی سطح تک تمام عملہ تبدیل کیا جائے تاکہ ملی بھگت سے محکمہ معدنیات کے وسائل کو ضائع ہونے سے بچایا جا سکے۔ محکمہ معدنیات کو مزید سٹرینتھن کرنے کے لئے تمام وسائل بروئے کار لائے جائیں۔ کرپشن کے خاتمے کیلئے تمام محکموں کو ڈیجیٹلائز کیا جائے اور ای ٹینڈرنگ کو متعارف کروایا جائے۔