پنجاب میں اسکولوں کے اوقات کار میں تبدیلی

سرکاری و نجی اسکول صبح 8:15بجے کے بعد کھولنے کے پابند ہوں گے
لاہور ( ڈیلی پاکستان آن لائن) پنجاب میں اسکولوں کے اوقات کار میں تبدیلی، صبح 8:15سے پہلے اسکول کھولنے پر پابندی ہو گی ۔ اس ضمن میں ڈی جی ماحولیات پنجاب عمران حامد شیخ نے نوٹیفکیشن جاری کردیا ۔ جس کے مطابق اسکولوں میں نئے اوقات میں تبدیلی فوری نافذ العمل ہو گی ۔ تمام سرکاری و نجی اسکول آج (بدھ ) 4دسمبر 2024 سے صبح 8:15بجے کے بعد کھولنے کے پابند ہوں گے۔ڈی جی ماحولیات عمران حامد شیخ نے بتایا کہ نوٹیفکیشن ماحولیاتی تحفظ ایکٹ 1997ء کے تحت جاری کیا گیا، خلاف ورزی کرنے والے اسکولز کے خلاف قانونی کارروائی عمل میں لائی جائے گی،نوٹیفکیشن کی خلاف ورزی پر جرمانے اور سزا کا اطلاق ہوگا۔ انہوں نے کہا کہ ماحولیاتی آلودگی کی روک تھام کے لیے یہ اقدامات کیے گئے ہیں،اسکول ایجوکیشن اور اسپیشل ایجوکیشن ڈیپارٹمنٹس کو احکامات پر عمل درآمد کا پابند بنایا گیا۔ تمام کمشنرز اور ڈپٹی کمشنرز کو ہدایات جاری، فیصلے پر مکمل عمل درآمد یقینی بنانے کا حکم دیا گیا ہے ۔ یہ فیصلہ طلبہ اور اساتذہ کی صحت کے تحفظ کے لیے کیا گیا۔