پنجاب فوڈ اتھارٹی کی کارروائیاں ،1516لیٹر دہی مکھن،1000کلو کھویا اور 209کلو ڈیری مصنوعات تلف

890یونٹس کی چیکنگ کے دوران 135کو 29لاکھ 22ہزار کے جرمانے عائد،جعلسازی میں ملوث 21یونٹ بند
لاہور (ڈیلی پاکستان آن لائن) پنجاب فوڈ اتھارٹی کی جانب سے ڈیری مصنوعات دیسی گھی، مکھن، دودھ ،دہی،چیز میں ملاوٹ کرنے والوں کیخلاف میراتھن کارروائیاں جاری ہیں ، 890یونٹس کی چیکنگ کے دوران 135کو 29لاکھ 22ہزار کے جرمانے عائد،جعلسازی میں ملوث 21یونٹ بند،، 23مقدمات درج ،1516لیٹر دہی مکھن،1000کلو کھویا اور 209کلو ڈیری مصنوعات تلف کر دی گئیں ۔ڈی جی فوڈ اتھارٹی عاصم جاوید نے بتایا کہ چیکنگ کے دوران 469کو اصلاحی نوٹس جاری، 139سیمپل لیبارٹری بھجوائے گئے۔لاہور ڈویژن میں 63، فیصل آباد ڈویژن میں 223، ساہیوال میں 106، راولپنڈی میں 21اور گوجرانوالہ میں 97یونٹس کی چیکنگ کی گئی۔ سرگودھا میں 120، ڈی جی خان میں 42، ملتان میں 92اور بہاولپور میں 126یونٹس کا معائنہ کیا گیا۔ سیمپل فیل ہونے پر 21یونٹس کو بند کیا گیا ۔ ڈیری پروڈکٹس میں پاوڈر، ممنوعہ کیمیکلز کی ملاوٹ ثابت ہونے پر تمام مصنوعات کو موقع پر تلف کیا گیا۔ ڈی جی فوڈ اتھارٹی نے کہا کہ ڈیری پروڈکٹس میں ملاوٹ انسانی صحت کیلئے انتہائی مضر ثابت ہوتی ہے ،پنجاب بھر میں روزانہ کی بنیاد پر دودھ کی ترسیل کی نگرانی کی جا رہی ہے،شہری گھر میں استعمال ہونے والے دودھ کو چیک کرواسکتے ہیں، شکایت کی صورت میں 1223 پر اطلاع کریں۔ صحت بخش خوراک کی فراہمی کے لیے صوبہ بھر میں مسلسل کارروائیاں جاری ہیں۔