پنجاب سیڈ کارپوریشن کے تمام پلانٹس کو سولر پینل پر منتقل کر دیا گیا ‘ علی ارشد رانا

پی ایم یو کے تحت گندم، مکئی، مونجی، کپاس اور دیگر فصلوں کے بیج کی تیاری بھرپور انداز میں جاری ہے’ مینیجنگ ڈائریکٹر
لاہور( ڈیلی پاکستان آن لائن)مینیجنگ ڈائریکٹر پنجاب سیڈ کارپوریشن علی ارشد رانا نے کہا ہے کہ پنجاب سیڈ کارپوریشن کے تمام پلانٹس کو سولر پینل پر منتقل کر دیا گیا ہے، پی ایم یو کے تحت گندم، مکئی، مونجی، کپاس اور دیگر فصلوں کے بیج کی تیاری بھرپور انداز میں جاری ہے،مقررہ اہداف کے حصول کو یقینی بنانے کے لیے 2026 تک موثر حکمت عملی اپنائی گئی ہے۔ایم ڈی پنجاب سیڈ کارپوریشن علی ارشد رانا کو پی ایم یو کے ڈائریکٹر شابی حسن نے پراجیکٹ کے تحت ہونے والی اب تک کی پیشرفت پر جامع بریفنگ دی۔ اس موقع پر ڈی ایم ڈی شمشاد اصغر وڑائچ، ڈائریکٹر پبلک ریلیشنز شاہد قادر، پی ایس او عامر سہیل بھٹی اور دیگر متعلقہ افسران بھی شریک تھے۔بریفنگ کے بعد میڈیا سے گفتگو کرتے ہوئے علی ارشد رانا نے کہا کہ پنجاب سیڈ کارپوریشن محکمہ زراعت میں کلیدی کردار ادا کرنے والا ادارہ ہے اور اسے مزید مضبوط اور فعال بنانے کے لیے مربوط اقدامات کیے جا رہے ہیں۔ ادارے میں بہتری کے لئے بے پناہ امکانات موجود ہیں، پی ایم یو کے تحت گندم، مکئی، مونجی، کپاس اور دیگر فصلوں کے بیج کی تیاری بھرپور انداز میں جاری ہے۔ انہوں نے بتایا کہ پنجاب سیڈ کارپوریشن کے تمام پلانٹس کو سولر پینل پر منتقل کر دیا گیا ہے، جس سے توانائی کے مسائل کا موثر حل ممکن ہوا ہے۔ انہوں نے یہ بھی بتایا کہ سول ورکس کا کام تکمیل کے آخری مراحل میں ہے اور جلد ہی میڈیا کو اس حوالے سے تفصیلی بریفنگ دی جائے گی۔علی ارشد رانا نے اس عزم کا اظہار کیا کہ پنجاب سیڈ کارپوریشن اور پی ایم یو کو مزید موثر اور فعال بنایا جائے گا تاکہ ملکی معیشت کو مضبوط بنانے میں اس ادارے کا کردار مزید نمایاں ہو۔