پنجاب حکومت کا پلاسٹک انڈسٹری کی رجسٹریشن آن لائن کرنے کا فیصلہ

10 دسمبر سے اینٹی پلاسٹک مہم اور کریک ڈاؤن کو مزید تیز کیا جائے گا: سینئر صوبائی وزیر

لاہور( ڈیلی پاکستان آن لائن)سینئر صوبائی وزیر مریم اورنگزیب نے کہا کہ وزیراعلیٰ مریم نواز شریف نے پلاسٹک پروڈیوسرز، سپلائرز، کلیکٹرز اور ری سائیکلرز کی رجسٹریشن آن لائن کرنے کا فیصلہ کیاہے۔ یہ رجسٹریشن پنجاب حکومت کا تاریخی اقدام ہے،جس سے پلاسٹک انڈسٹری کا ڈیٹا ایک جگہ اکٹھا کیا جائے گا۔بذریعہ رجسٹریشن پلاسٹک کی سپلائی سائیڈ کو غیر رسمی معیشت سے نکال کر مکمل طور پر رسمی معیشت کا حصہ بنانا مقصود ہے۔ انہوں نے کہاکہ اس اقدام سے نہ صرف ماحولیاتی آلودگی پر قابو پایا جائے گا بلکہ معیشت میں شفافیت کو بھی فروغ ملے گا۔ وزیراعلیٰ مریم نواز شریف کی ہدایت پر پنجاب کو پلاسٹک فری بنانے کیلئے محکمہ تحفظ ماحول کی کارروائیاں شدت سے جاری ہیں۔ مریم اورنگزیب نے کہا کہ 75 مائکرون سے کم حجم والے پولیتھین بیگز کے خلاف ایکشن لیا جارہا ہے۔ محکمہ تحفظ ماحول نے 9 پلاسٹک تھیلے بنانے والی فیکٹریوں کو خلاف ورزی پر نوٹس جاری کر دیئے۔ اینٹی پلاسٹک اسکواڈز پلاسٹک تھیلوں پر پابندی کے نفاذ کے لیے فوڈ پوائنٹس، مارکیٹوں اور دکانوں کا معائنہ کر رہے ہیں۔ ماحولیاتی آلودگی پر قابو پانے کے لیے پلاسٹک بیگز کے استعمال کو ختم کرنے کے لیے سخت اقدامات کر رہے ہیں۔ انہوں نے کہا کہ محکمہ تحفظ ماحول 10 دسمبر سے اینٹی پلاسٹک مہم اور کریک ڈاؤن کو مزید تیز کرے گا، عوام تعاون کریں۔