پنجاب بھر میں دھند کا راج، راستے گم ہو گئے ،موٹر ویز متعدد مقامات سے بند

لاہور( ڈیلی پاکستان آن لائن)صوبائی دارالحکومت لاہور سمیت پنجاب بھر میں دھند نے ڈیرے ڈال لیے جس سے راستے گم ہو گئے، حد نگاہ کم ہونے پر موٹرویز کو کئی مقامات سے بند رکھا گیا ۔ترجمان موٹرویز پولیس کے مطابق موٹروے ایم 2 لاہور سے ہرن مینارانٹر چینج ، موٹروے ایم 3 سمندری سے فیض پور ، موٹروے ایم 4 پنڈی بھٹیاں سے ملتان ،موٹروے ایم 5 پر شیرشاہ سے ظاہر پیرتک ٹریفک کے لئے بند رکھی گئی ، سیالکوٹ موٹر وے کو بھی دھند کی وجہ سے بند رکھا گیا جس کی وجہ سے مسافروں کو شدید مشکلات کا سامنا کرنا پڑا۔ترجمان نے کہا کہ قومی شاہراہوں پر بھی حد نگاہ انتہائی کم ہے، لاہور میں شدید دھند کے باعث ٹریفک کی روانی متاثر ہے، شہری غیر ضروری سفر سے گریز کریں، ڈرائیورحضرات فوگ لائٹس کا استعمال یقینی بنائیں۔