پاک چین تجارتی خسارے کو کم نہ کیا گیا تو یہ مستقبل میں ایک بڑا مسئلہ بن سکتا ہے، صدرپاک چین جوائنٹ چیمبر آف کامرس اینڈ انڈسٹری

پاک چین تجارتی خسارے کو کم نہ کیا گیا تو یہ مستقبل میں ایک بڑا مسئلہ بن سکتا ہے، صدرپاک چین جوائنٹ چیمبر آف کامرس اینڈ انڈسٹری

باہمی تجارت میں چین سے پاکستان کو ویسا ریلیف نہیں مل رہا جیسا باقی ایشیائی ممالک سے مل رہا ہے، ایس-ایم-نوید

لاہور فروری 28 (ڈیلی پاکستان آن لائن) پاک چین جوائنٹ چیمبر آف کامرس اینڈ انڈسٹری کے صدر ایس-ایم-نوید نے کہا ہے کہ باہمی تجارت میں چین سے پاکستان کو ویسا ریلیف نہیں مل رہا جیسا باقی ایشیائی ممالک سے مل رہا ہے اور دونوں ممالک کے مابین تجارت میں اگرپاکستانی خسارے کوبروقت کم نہ کیا گیا تومستقبل میں یہ ہمارے لیے ایک بڑا مسئلہ بن جائے گا.

ڈیلی پاکستان آن لائن سے خصوصی انٹرویو میں انہوں نے کہا ہے کہ چین کی جانب سے باہمی تجارت میں پاکستان کو آسیان ممالک کے مقابلے میں کم ریلیف مل رہا ہے اور وہ اگلی میٹنگ میں اس سئلے کو ایجنڈے میں لے کر آئیں گے۔ انہوں نے اس حوالے سے امید ظاہر کی ہے کہ جلد ہی اس سمت میں مثبت پیش رفت ہو گی.

انہوں نے چین کی جانب سے مقررہ کردہ ٹیرف کے حوالے سے کہا ہے کہ چین نے پاکستانی اشیاء پر جو ٹیرف مقرر کیا ہے وہ اسے کم نہیں کر رہا اور میرا حکومت سے مطالبہ ہے کہ وہ اس مسئلے کو چین کے ساتھ مل کر حل کرے.

ایس-ایم-نوید نے مزید کہا کہ اگر چین صرف ہماری ٹکسٹائل پر ڈیوٹی کم کردے تو پاکستان میں ٹکسٹائل کی پیداوار میں اضافہ ہو سکتا ہے.
انہوں نے کہا ہے کہ ہمیں ایسے پروجیکٹ شروع کرنے چاہیں جس سے ہماری ایکسپورٹ میں اضافہ ہو.

انہوں نے کہا کہ ملک میں غربت کم کرنے کے لیے ہمیں فوری طور پر کارپوریٹ فارمنگ کے شعبے کی طرف خصوصی توجہ دینی چاہیے. یہ خوش آئند بات ہے کہ وزیراعظم عمران خان اس شعبے کی طرف خصوصی توجہ دے رہے ہیں.

انہوں نے کہا کہ جتنے زائد ممالک سی پیک میں انڈسٹری لگائیں گے اتنا ہی ملک میں زرمبادلہ آئے گا اور بےروزگاری میں واضح کمی آئے گی.
انہوں نے مزید کہا کہ ملک میں ہنرمند افراد کی کمی نہیں ہےاور چین جہاں لیبر900 ڈالر تک ہے اس کے مقابلے میں ہمارے ہاں لیبر بھی سستی ہے جو تقریبآ 150 سے 270 ڈالر تک ہے.