پاکستان کا امن اسکی طاقتور فوج کی وجہ سے ہے’احسن اقبال

9مئی کو جو کچھ ہوا اس طرح دنیا کے کسی ملک میں نہیں ہوتا ‘ وفاقی وزیر منصوبہ بندی
نارووال ( ڈیلی پاکستان آن لائن +این این ائی)وفاقی وزیر منصوبہ بندی وترقی احسن اقبال نے کہا ہے کہ معاسی ترقی کیلئے پالیسیوں کا تسلسل نا گزیر ہے،پاکستان کو انتشار کی بجائے امن کی ضرورت ہے،میرے اوپر جھوٹے کیس بنا کر جیل میں ڈالنے والا خود عبرت کا نشان بنا ہوا ہے ۔ان خیالات کا اظہار انہوں نے نارووال میں وزیراعلی پنجاب گرین ٹریکٹر سکیم کی افتتاحی تقریب سے خطاب کرتے ہوئے کیا۔احسن اقبال نے کہا کہ 2018میں جب ہم نے حکومت چھوڑی تب گندم،چاول اور گنا سمیت مختلف اجناس میں ہم خود کفیل تھے،تبدیلی سرکار نے اچھی بھلی زراعت کو بھی برباد کرکے رکھ دیا تھا۔2018میں ایک اناڑی کو پاکستان کی چابی دی گئی،اس اناڑی نے معیشت برباد کرکے مہنگائی کی شرح میں تاریخی اضافہ کردیا،ہم نے جو اصلاحات کیںان کے لئے ضروری ہے کہ حالات پر امن رہیں،معاشی ترقی کیلئے پالیسیوں کا تسلسل ضروری ہے،پاکستان کو انتشار کی بجائے امن کی ضرورت ہے،نواز شریف کی جب حکومت آئی اس کو کام سے روک کر سازش سے نکال دیا گیا۔وفاقی وزیر احسن اقبال نے کہا کہ آج ایک سیاسی جماعت اپنے ملک اور فوج کے خلاف زہر اگل رہی ہے،پاکستان کا امن اس کی طاقتور فوج کی وجہ سے ہے۔9 مئی کو جو کچھ ہوا اس طرح دنیا کے کسی ملک میں نہیں ہوتا،ایک شخص پاکستان کی سیاست میں زہر گھولنے اور نفرت بھرنے والا ہے،کوئی شخص یہ ثابت نہیں کرسکتا کہ میں نے کبھی پاکستان کے خزانے سے ایک پیسہ بھی لیا ہو،میرے اوپر جھوٹے کیس بنا کر جیل بھیجا گیا،اڈیالہ جیل میں عبرت کا نشان بنا شخص اللہ کی پکڑ میں ہے۔ وفاقی وزیر احسن اقبال نے کہا کہ میں گرین ٹریکٹر حاصل کرنے والے کسانوں کو مبارکباد دیتا ہوں۔مجھے خوشی ہے کہ میں آج اس محنت کش طبقے سے مخاطب ہوں کہ جو اپنی محنت کے ساتھ ہمارے کھانے کی ٹیبل کو سجاتے ہیں ،زراعت ہماری معیشت کا% 24حصہ ہے،اگر پاکستان کی زراعت ترقی کرے گی تو پاکستان کی معیشت ترقی کرے گی ،پاکستان میں پانی،زرخیز زمیناور چار موسم اللہ تعالی کی بہت بڑی نعمت ہیں،ہمارا شمار دنیا میں اجناس پیدا کرنے والے پہلے دس ملکوں میں ہوتا ہے۔فی ایکڑ پیداوار کے حوالے سے ہم دنیا میں بہت نیچے ہیں۔زرعی معیشت کی بہتری کیلئے ہمیں دودھ اور زرعی پیداوار کو بہتر بنانا ہوگا۔کاشت کے بہتر طریقوں اور اعلی بیجوں کے انتخاب سے ہم زرعی پیداوار کو بڑھا سکتے ہیں۔ہمیں زرعی پیداوار میں کیمیکل کے وافر استعمال کو ترک کرنا ہوگاکیونکہ کیمیکل کی زیادہ آمیزش والی فصل ایکسپورٹ نہیں کی جاسکتیں۔کسانوں کو یہ بتانا چاہیے کہ کونسی فصلیں بآسانی برآمد کی جاسکتی ہیں۔حکومت زرعی ترقی کیلئے ٹیکنالوجی کے استعمال کی طرف جارہی ہے۔زرخیز زمین کے باوجود ہم گندم امپورٹ کررہے ہیں۔احسن اقبال نے کہا کہ پی ٹی آئی والے بتائیں کہ 4سال کی حکومت میں آپ نے کیا کیا تھا۔لنگرخانوں پر سارا خرچ اس وقت کی حکومت کی بجائے سیلانی فائونڈیشن کرتی تھی۔پی ٹی آئی کے 4سالوں میں نارووال میں کون سا نیا منصوبہ بنا۔ہم نے 15 سالوں میں نارووال کو تبدیل کرکے رکھ دیا ہے۔ نارووال پاکستان میں علم بانٹنے والا ضلع بن گیا ہے۔نارووال میڈیکل کالج کے قیام سے یہاں کی ہیلتھ کئیر میں بہتری آئے گی۔اسی سال نارووال میں زراعت کی تعلیم کیلئے زرعی کالج قائم کردیا جائے گا۔چین اربوں روپے کا گوشت خریدنے کیلئے تیار ہے ہمیں ایسے موقعوں سے فائدہ حاصل کرنا چاہیے ،کسان مضبوط ہوگا تو پاکستان مضبوط ہوگا۔