پاکستان میں دراندازی کی کوشش ناکام،15سے زائد خوارج و افغان طالبان ہلاک و زخمی

تقریباً25 خوارج نے افغان طالبان کی بارڈر پوسٹوں کے ذریعے کرم اور شمالی وزیرستان میں در اندازی کی کوشش کی
اسلام آباد ( ڈیلی پاکستان آن لائن ) پاکستان میں دراندازی کی کوشش میں 15سے زائد خوارج اور افغان طالبان ہلاک و زخمی ہو گئے۔ذرائع کے مطابق 27, 28 دسمبر کی شب فتن الخوارج کے 20سے 25دہشت گردوں نے افغان طالبان کی بارڈر پوسٹوں کا استعمال کرتے ہوئے کرم اور شمالی وزیرستان میں 2مقامات سے پاکستان میں در اندازی کی کوشش کی، جس پر پاکستانی سکیورٹی فورسز نے بروقت کارروائی کر کے در اندازی کی کوشش ناکام بنا دی۔28دسمبر کی علی الصبح خوارج نے دوبارہ افغان طالبان کی پوسٹوں کو استعمال کرتے ہوئے پاکستان میں در اندازی کی کوشش کی اور ناکام ہونے پر 28دسمبر کی علی الصبح خوارج اور افغان طالبان نے مل کر پاکستانی پوسٹوں پر بِلا اشتعال بھاری ہتھیاروں سے فائر کھول دیا۔پاکستانی سکیورٹی فورسز نے اس بلا اشتعال فائرنگ کا بھرپور اور منہ توڑ جواب دیا۔مصدقہ ذرائع کے مطابق افغانستان سائیڈ پر بھاری نقصانات کی ابتدائی اطلاعات ملی ہیں۔ موثر جوابی فائر سے 15سے زائد خوارج اور افغان طالبان کے ہلاک ہونے اور متعدد کے زخمی ہونے کی مصدقہ اطلاعات ہیں۔ موثر جوابی کارروائی اور گولہ باری سے افغان طالبان 6پوسٹیں چھوڑ کر بھی بھاگ گئے۔ افغان سائڈ پر نقصانات مزید بڑھنے کی بھی اطلاعات سامنے آ رہی ہیں۔پاکستانی سکیورٹی فورسز کا کوئی جانی نقصان نہ ہونے اورصرف 3زخمی ہونے کی اطلاعات ہیں۔ ذرائع کا کہنا ہے کہ پاکستان نے بارہا عبوری افغان حکومت سے فتن الخوارج کو پاکستان کے خلاف اپنی سر زمین استعمال نہ کرنے کا کہا ہے، جس پر بجائے فتن الخوارج کو کنٹرول کرنے کے اور ان دہشت گرد عناصر کی سرکوبی کرنے کے، افغان طالبان فتن الخوارج کی مسلسل معاونت کر رہے ہیں۔فتن الخوارج افغانستان میں پوری آزادی کے ساتھ موجود ہیں اور پاکستان مخالف دہشت گردانہ سرگرمیوں کے لیے افغان سر زمین کا بے دریغ استعمال کر رہے ہیں۔ پاکستان سکیورٹی فورسز کسی بھی طرح کی جارحیت کا منہ توڑ جواب دینے کی صلاحیت رکھتی ہیں۔