پاک،سعودی تعلقات نے نیا موڑ لیا ہے : عطا اللہ تارڑ

وزیراعظم شہباز شریف ،سعودی ولی عہد محمد بن سلمان کے درمیان غیرمعمولی ملاقات ہوئی

اسلام آباد(ڈیلی پاکستان آن لائن)وفاقی وزیر اطلاعات و نشریات عطا تارڑ نے کہا ہے کہ کل پاکستان اور سعودی عرب کے تعلقات نے نیا موڑ لیا ہے،پاک سعودی تعلقات میں بہتری آئی ہے، جو مزید مضبوط ہوئے ہیں، دونوں ممالک کے درمیان 8 معاہدوں پر کام شروع ہوچکا ہے۔یہاں پریس کانفرنس کرتے ہوئے انہوںنے کہا کہ وزیراعظم اور سعودی ولی عہد محمد بن سلمان کے درمیان غیرمعمولی ملاقات ہوئی۔6 ماہ میں وزیراعظم سعودی ولی عہد محمد بن سلمان سے 5 بار ملے، شہباز شریف کا دورہ سعودی عرب 27 گھنٹے کا تھا۔انہوں نے کہاکہ سعودی ولی عہد نے کہا کہ پاکستان میں جتنی بھی سرمایہ کاری کی جائے کم ہے، دونوں رہنمائوں نے دو طرفہ تعلقات بڑھانے اور تعاون مضبوط کرنے پر اتفاق کیا۔عطا تارڑ نے یہ بھی کہا کہ دنیا میں ہم جہاں جہاں جاتے ہیں عالمی رہنما پاکستان کی معاشی ترقی کی تعریف کرتے ہیں، اربوں ڈالرز کی سرمایہ آئے گی تو مہنگائی مزید کم ہوگی۔انہوں نے کہا کہ شرح سود کا 15 فیصد سے نیچے آنا خوشی کی بات ہے، حکومتی اقدامات کی بدولت ملک میں مہنگائی میں کمی آرہی ہے، آئندہ سعودی عرب کے مزید وفود بھی پاکستان آئیں گے۔وفاقی وزیر اطلاعات نے کہا کہ سعودی حکومت سرمایہ کاری سے متعلق پاکستانی اقدامات سے مطمئن ہے، موثر پالیسیوں کی وجہ سے معیشت بہتری کی جانب گامزن ہے۔ان کا کہنا تھا کہ مستقبل میں سعودی عرب سے مزید سرمایہ کاری پاکستان آئے گی، 28 ایم او یوز پر دستخط ہوئے، 8 پراجیکٹس پر کام شروع ہوچکا ہے۔عطا تارڑ نے کہا کہ واٹر سمٹ میں وزیراعظم شہباز شریف نے انڈس واٹر ٹریٹی کا بھی ذکر کیا، اس دوران پرائم منسٹر نے فرانس کے صدر سے بھی ملاقات کی۔