وفاق کے دئیے فنڈز پشتونوں کے بجائے فوج مخالف پروپیگنڈا کرنے والوں میں بانٹے جا رہے ہیں’عظمیٰ بخاری

کرپشن کے خلاف جہاد کا اعلان کرنے والے علی امین کی ناک کے نیچے سے 799ملین غائب ہوگئے’وزیر اطلاعات پنجاب
لاہور (ا ین این آئی) وزیر اطلاعات پنجاب عظمیٰ بخاری نے کہا ہے کہ وفاق کے دئیے گئے فنڈز پشتونوں کے بجائے فوج مخالف پروپیگنڈا کرنے والوں میں بانٹے جا رہے ہیں،کرپشن کیخلاف جہاد کا اعلان کرنے والے علی امین کی ناک کے نیچے سے 799ملین غائب ہوگئے۔انہوں نے کہا کہ خیبرپختونخواہ میں بینظیر نشونما پروگرام میں بڑے پیمانے پر مالی غبن اور گھوسٹ ملازمین کا انکشاف ہوا ہے،ورلڈ فوڈ پروگرام نے اس پروگرام پر خیبرپختونخواہ میں کام روک دیا ہے، ورلڈ فوڈ پروگرام نے مالی بے ضابطگیوں ،گھوسٹ ملازمین کے معاملے پر صوبائی حکومت پرسوالات اٹھائے ہیں۔ انہوںنے کہا کہ سرکاری دستاویزات میں صرف تنخواہوں میں 799ملین کی بے ضابطگیوں کی نشاندہی کی گئی ہے،ظالموں نے ماں اور بچے کی صحت پر خرچ ہونے والے فنڈز کو بھی نہیں بخشا،کرپشن کے خلاف جہاد کرنے کا اعلان کرنے والے علی امین کی ناک کے نیچے سے 799ملین غائب ہوگئے ،اس سے قبل مساجد کے آئمہ کرام کے نام پر 70کروڑ کے فنڈز غائب کر دیئے گئے، یہ تمام پیسہ سوشل میڈیا پر پاکستان اور اداروں کیخلاف مہم چلانے والے برگیڈ سیل کو دیئے جاتے۔عظمیٰ بخاری نے کہا کہ جس پیسے سے پشتون قوم کے بچوں کو اسکالرشپ،الیکٹرک بائیکس مل سکتی تھی وہ سوشل ٹرولز کی جیبوں میں جارہا، کے پی کے مشیر خزانہ ہر ہفتے وفاق کو فنڈز کی فراہمی کیلئے خط لکھتے ہیں، وفاق کے دیئے فنڈز پشتونوں کی بجائے فوج مخالف پروپیگنڈے کرنے والے کو بانٹے جارہے ہیں۔