وزیر تعلیم پنجاب کا مستحق طلبہ کو اپنی جیب سے 5ہزار یونیفارم ،جرسیاں دینے کا اعلان

رانا سکندر حیات نے فری یونیفارم ڈرائیو شروع کردی ،عوام سے حصہ ڈالنے کی اپیل

لاہور(این این آئی) صوبائی وزیر تعلیم رانا سکندر حیات نے سرکاری سکولوں میں پڑھنے والے مستحق طلباء و طالبات کیلئے موسم سرما کی مناسبت سے فری یونیفارم ڈرائیو شروع کرتے ہوئے ذاتی حیثیت میں5ہزار بچوں کو یونیفارم اور جرسیاں دینے کا اعلان کر دیا ۔ اپنے ویڈیو بیان میں صوبائی وزیر تعلیم رانا سکندر حیات نے کہا کہ حقوق العباد سب سے اہم ہے ، موسم کی شدت میں اضافہ ہو گیا ہے اور بہت سے والدین ایسے ہیںجو اپنے بچوںکو یونیفارم اور جرسی نہیں لے کر دے سکتے ۔ انہوںنے کہاکہ کوئی بھی شہری جو بیشک ایک یونیفارم اورجرسی دینے کی استطاعت رکھتا ہے وہ اپنے شہر یا گائوں کے کسی سرکاری سکول میں دے کر اپنا حصہ ڈالے ۔ صوبہ بھر کے صنعتکاروں سے اپیل ہے کہ وہ بھی اپنی مالی حیثیت کے مطابق اس میں اپنا کردار ادا کریں کیونکہ سرکاری سکولوں میں پڑھنے والے ہم سب کے بچے اور بچیاں ہیں۔ انہوں نے کہا کہ حکومت سرکاری سکولوں کا معیار بہتر کرنے کے لئے دن رات کام کر رہی ہے ،ہم نے چھ مہینے پالیسیاں بنانے پر کام کیا اب عملی پیشرفت کے لئے ضلع کی سطح پر نکل رہے ہیں۔مریم نواز کی قیادت میں ہمیں دو سال چاہئیں ، ان شا اللہ مہنگے مہنگے پرائیویٹ سکولوںمیں پڑھنے والے بچے سرکاری سکولوںمیں پڑھیں گے۔ ہم نے سرکاری سکولوںمیں تعلیم کے معیار کو بہتر بنانا ہے میرے سمیت تمام لوگوںکے بچے سرکاری سکولوں میں پڑھنے کو ترجیح دیں گے ۔ انہوں نے کہا کہ ہم سکولوںمیں کمرے پورے کر رہے ہیں ، سکولوںکو اساتذہ دے رہے ہیں ،ریشنلائزیشن ، اپ گریڈیشن کر رہے ہیں ،اساتذہ کے لئے کارڈیک ہسپتال ، ان کی انشورنس کے لئے محنت کر رہا ہوں ،بہادر اساتذہ سرکاری سکولوںمیں ہمارے بچوںکو پڑھا رہے ہیں ، اساتذہ وزیر اعلیٰ کے سرکاری معیاری سکول کے وژن کو آگے بڑھائیں ۔