”نیا پاکستان منزلیں آسان ”منصوبے میں مالی بے ضابطگیوں پر تحریک التوائے کار جمع

لاہور ( ڈیلی پاکستان آن لائن) سابق وزیر اعلیٰ پنجاب عثمان بزدار کے دور میں شروع ہونے والے منصوبے ”نیا پاکستان منزلیں آسان ” میں سامنے آنے والی 30ارب روپے کی مالی بے ضابطگیوں پر پنجاب اسمبلی سیکرٹریٹ میں تحریک التوائے کار جمع کروا دی گئی ۔ حکمران جماعت مسلم لیگ (ن) کی رکن اسمبلی اسماء احتشام الحق کی جانب سے جمع کروائی گئی تحریک کے متن میں کہا گیا ہے کہ پی ٹی آئی کے دور حکومت میں نیا پاکستان منزلیں آسان منصوبہ فزیبلیٹی رپورٹ اور بغیر قانونی تقاضے پورے کیے بغیر ہی شروع کر دیا گیا،جس کی وجہ سے 30ارب روپے کی مالی بے ضابطگیوں کی نشاندہی ہوئی ہے ۔ مزید کہا گیا ہے کہ نیا پاکستان منزلیں آسان منصوبے کا پی سی ٹو ہی تیار نہیں کیا گیا ،پلاننگ کمیشن کی ہدایات کو مکمل طور پر نظر انداز کیا گیا۔سی اینڈ ڈبلیو ڈیپارٹمنٹ نے آڈٹ ڈیپارٹمنٹ کو مالی بے ضابطگیوں سے متعلق کوئی جواب نہیں دیا ۔