مسرت جمشید چیمہ نے پارٹی کی موجودہ قیادت کو اہم مشورہ دیدیا

لاہور( ڈیلی پاکستان آن لائن) پاکستا ن تحریک انصاف کی سینئر رہنما مسرت جمشید چیمہ نے پارٹی کی موجودہ قیادت کو جیلوں میں قید رہنمائوں سے پارٹی اور سیاسی معاملات میں مشاورت کی تجویز دیتے ہوئے کہا ہے کہ تحریک انصاف کے رہنما جو اس وقت ناحق قید میں ہیں انہوں نے خط لکھ کر بہترین تجاویز دی ہیں جن پر عملدرآمد کرنا چاہیے ۔ اپنے بیان میں مسرت جمشید چیمہ نے کہا کہ جو باہر لوگ ہیں اور پارٹی کی قیادت کر رہے ہیں وہ جیلوںمیں قید کاٹنے والے رہنمائوں سے پارٹی اورسیاسی معاملات میں مشاورت کر لیا کریں،یہ پارٹی کیلئے بھی اور ملک کے لئے بھی بہتر ہوگا۔مسرت جمشید چیمہ نے کہاکہ اس وقت پارٹی کو بھرپور اتحاد کی ضرورت ہے ، ایک دوسرے کے بارے میں بد گمانیاں پیدا کرنے کی بجائے کندھے سے کندھا ملا کر چلا جائے تاکہ ہمارے مخالف جو منفی پراپیگنڈا کر رہے ہیں انہیں منہ توڑ جواب مل سکے ۔ انہوں نے کہا کہ مسلم لیگ (ن) اور پیپلز پارٹی کو عوام سے کوئی سرو کار نہیں اس لئے یہ جمہور کی آواز کو بھی اہمیت نہیں دیتے ۔ معاشی اشاریوں کو اوپر جاتا دکھانے کے لئے جو فرمائشی پروگرام چل رہا ہے عوام اس سے اچھی طرح آگاہ ہیں ، آج حالات یہ ہیں کہ لوگ دو وقت کی روٹی کھانے سے قاصر ہیں اور جعلی حکمران دودھ اور شہد کی نہریں بہا دینے کے دعویدار ہیں۔مسرت جمشید چیمہ اور ان کے شوہر جمشید اقبال چیمہ بانی چیئرمین عمران خان کے قریبی سمجھے جاتے ہیں اور دونوں جیل کی سزا بھی کاٹ چکے ہیں۔