مریم نواز شریف سے یو اے ای کے سفیر کی ملاقات ،پنجاب اور یو اے ای کا ورکنگ گروپ قائم کرنے کا فیصلہ

وزیر اعلیٰ مریم نواز کی یو اے ای کے انویسٹرز کو پنجاب میںسرمایہ کاری کی دعوت ، خصوصی مراعات اور سازگار ماحول کی یقین دہانی
لاہور (ڈیلی پاکستان آن لائن)وزیر اعلیٰ پنجاب مریم نواز شریف سے متحدہ عرب امارات کے سفیر حماد عبید ابراہیم الزعابی نے ملاقات کی۔ ملاقات میں دو طرفہ تعاون کو مزید بلندی پر پہنچانے کے لئے پنجاب اور یو اے ای کا ورکنگ گروپ قائم کرنے کا فیصلہ کیا گیا۔ معاشی تعاون اور پنجاب میں ترقیاتی منصوبوں اور سیاحت کے فروغ پر تبادلہ خیال کیا گیا۔ وزیر اعلیٰ مریم نواز شریف نے متحدہ عرب امارات کے سرمایہ کاروں کو پنجاب میں سرمایہ کاری کے لئے دعوت دی اور یو اے ای کے سرمایہ کاروں کیلئے خصوصی مراعات اور سازگار ماحول کی یقین دہانی کرائی۔ وزیراعلیٰ مریم نواز شریف نے متحدہ عرب امارات کی پاکستان کی سماجی و اقتصادی ترقی میں تعاون کو سراہا۔ یو اے ای کے سفیرنے وزیر اعلیٰ مریم نواز شریف کو کامیاب دورہ چین پر مبارکباد دی۔ سفیر حماد عبید ابراہیم الزعابی نے پنجاب میں جاری ترقیاتی منصوبوں، موسمیاتی تبدیلیوں سے متعلق اقدامات پر وزیر اعلیٰ مریم نواز شریف کی تعریف کی۔ وزیر اعلیٰ مریم نوازشریف نے کہا کہ انفراسٹرکچر، صحت، تعلیم اور توانائی کے شعبوں میں یو اے ای کی معاونت کو قدر کی نگاہ سے دیکھتے ہیں ۔ پاکستان اور متحدہ عرب امارات کے تعلقات باہمی اعتماد اور احترام پر مبنی ہیں۔ پاکستان اور یو اے ای علاقائی استحکام اور خوشحالی کے لئے یکساں سوچ رکھتے ہیں۔ انہوں نے کہا کہ پنجاب زراعت، ٹیکنالوجی،گرین انرجی اور دیگر شعبوں میں یو اے ای کے ساتھ تعاون کا خواہاں ہے۔ متحدہ عرب امارات کے سفیرنے کہا کہ ترقی یافتہ پاکستان کی یو اے ای کی خواہش ہے اس سفر میں حکومت اور عوام کے شانہ بشانہ کھڑے ہے۔ پاکستان میں مزید پراجیکٹس پر کام کرنا چاہتے ہیں۔ حکومت پنجاب کے ساتھ پبلک پرائیویٹ پارٹنرشپ کے ذریعے دیرپا ترقی کے فروغ کے لئے پرعزم ہے۔