مدارس بل معاملہ اب حل کے قریب ، مولانا فضل الرحمان سے اْن کے تحفظات پر بات ہو رہی ہے،عرفان صدیقی

پی ٹی آئی کو ملک کی عزت کاخیال نہیں،ٹرمپ سے امیدفضول ،مقدمات کاسامناکریں،لیگی سینیٹرکی نجی ٹی وی سے گفتگو
اسلام آباد(ڈیلی پاکستان آن لائن +این این آئی)مسلم لیگ(ن) کے سینیٹر عرفان صدیقی نے کہا ہے کہ مدارس بل معاملہ اب حل کے قریب ہے، مولانا فضل الرحمان سے اْن کے تحفظات پر بات ہو رہی ہے۔نجی ٹی وی سے گفتگوکرتے ہوئے عرفان صدیقی نے کہا کہ (آج)منگل کو ہمارا جوائنٹ سیشن ہے، امکانی طور پر ایک متفقہ بل لانے میں کامیاب ہوجائیں گے۔انہوں نے کہا کہ مدارس بل کا معاملہ اب حل ہونے کے قریب ہے، مولانا سے ان کے تخفظات پر بھی بات ہو رہی ہے، دیگر علما کرام سے بھی بات ہورہی ہے۔ن لیگی سینیٹر نے کہا کہ ہمیں نہیں معلوم کہ امریکی صدر ڈونلڈ ٹرمپ کی ترجیحات کیا ہوں گی، نہیں معلوم وہ کس حد تک دوسرے ممالک میں مداخلت کریں گے۔انہوں نے کہاکہ ایک قیدی یہاں موجود ہے جس نے اسامہ بن لادن کی تلاش میں امریکا کی مدد کی تھی، امریکا نے بارہا اس کو حوالے کرنے کا مطالبہ کیا لیکن وہ ہماری تحویل میں ہے۔عرفان صدیقی نے کہا کہ نہیں سمجھتا کہ امریکا سمیت کوئی بیرونی طاقت پاکستان کے داخلی معاملات میں مداخلت کرے گی۔انہوں نے کہا کہ یہ پاکستان کے بارے میں کہتے ہیں کہ یہاں غزہ سے زیادہ مظالم ہورہے ہیں، یہ کہتے ہیں کہ مقبوضہ کشمیر میں تو کچھ بھی نہیں ہورہا جو پاکستان میں ہورہا ہے۔ن لیگی سینیٹر نے کہاکہ ان لوگوں کو نہ اپنے ملک کا پاس ہے نہ پاکستان کی عزت کا کوئی خیال ہے، ان کیلئے سیدھا راستہ یہ ہے کہ مقدمات کا سامنا کریں۔انہوںنے کہاکہ وہاں سے بری ہوتے ہیں تو ٹھیک ہے آجائیں باہر اور کردار ادا کریں، اگر یہ امریکا سے یا ان کی کانگریس سے تکیہ لگائے بیٹھے ہیں تو یہ نہیں ہو گا۔