محسن نقوی کا دورہ پاسپورٹ آفس، ایجنٹ مافیا کا صفایا کرادیا، عوام کا خراج تحسین

وزیرداخلہ کا پاسپورٹ آفس گارڈن ٹائون کا اچانک دورہ ،شہریوں نے پاسپورٹ بنوانے کے عمل پر اطمینان کا اظہار کیا
لاہور (ڈیلی پاکستان آن لائن) وفاقی وزیر داخلہ محسن نقوی نے گارڈن ٹائون پاسپورٹ آفس سے ایجنٹ مافیا کا مکمل صفایا کرادیا جس پر سائلین نے انہیں خراج تحسین پیش کیا ہے۔وفاقی وزیرداخلہ محسن نقوی نے ہفتہ کے روز لاہور میں پاسپورٹ آفس گارڈن ٹائون کا اچانک دورہ کیا اور پاسپورٹ بنوانے کے لئے آئے شہریوں سے ملاقات کی، محسن نقوی نے شہریوں سے پاسپورٹ بنوانے کے عمل کے بارے دریافت کیا، شہریوں نے پاسپورٹ بنوانے کے عمل پر اطمینان کا اظہار کیا۔شہریوں نے وفاقی وزیر داخلہ سے گفتگو کرتے ہوئے کہا کہ 24 گھنٹے پاسپورٹ آفس کھلنے سے بے پناہ رش ختم ہو گیا ہے۔وزیر داخلہ مختلف کائونٹرز پر گئے اور شہریوں سے گفتگو کی، محسن نقوی نے بعض شہریوں کے مسائل موقع پر حل کرنے کے لیے احکامات دیئے، بعض شہریوں نے علاقے میں ایجنٹ مافیا کی شکایات کی جس پر وفاقی وزیرداخلہ نے فوری نوٹس لیتے ہوئے ایف آئی اے کو فی الفور کریک ڈائون کا حکم دیا۔اس موقع پر وزیر داخلہ محسن نقوی کا کہنا تھا کہ شہریوں کی سہولت سب سے زیادہ عزیز ہے، پاسپورٹ ملنے میں تاخیر کی شکایات کا بھی ازالہ کیا جا رہا ہے، شہریوں کا اعتماد میرے لیے اطمینان کا باعث ہے۔