لیسکو ملازمین کی تنخواہوں میں کروڑوں روپے کے مالی فراڈ کا انکشاف

ابتدائی طور پر 30کروڑ روپے کے فراڈ کی نشاندہی، تحقیقات کیلئے اعلیٰ سطحی کمیٹی تشکیل
لاہور ( ڈیلی پاکستان آن لائن) لاہور الیکٹرک سپلائی کمپنی ( لیسکو )میں افسران و ملازمین کی تنخواہوں کی مد میں کروڑوں روپے کے مالی فراڈ ہونے کا انکشاف ہوا ہے، کمپنی نے اعلی سطح کمیٹی تشکیل دیکر تحقیقات کا آغاز کر دیا۔ذرائع کے مطابق لیسکو میں افسران و ملازمین کی تنخواہوں کی مد میں کروڑوں روپے کا مالی فراڈ سامنے آیا ہے جس کے لئے کروڑوں روپے کے غبن کی تحقیقات کے لئے اعلی سطح کمیٹی تشکیل دیدی گئی ہے۔ بورڈ آف ڈائریکٹرز کی ہدایات کی روشنی میں کمیٹی نے انکوائری بھی شروع کر دی ہے،لیسکو کے افسران و ملازمین نے ریکارڈ میں ہیرہ پھیری کر کے کروڑوں روپے کا فراڈ کیا،ابتدائی طور پر 30کروڑ روپے کے فراڈ کی نشاندہی کی گئی، سیلری اکائونٹس کی مدد سے اضافی رقوم خردبرد کر کے جمع کروائی گئیں،تحقیقاتی کمیٹی نے افسران و ملازمین کے بیانات قلمبند کرنا شروع کر دیئے ہیں۔ذرائع کے مطابق لیسکو میں اس سے قبل بھی پنشن کی ادائیگیوں میں خردبرد کے سکینڈلز سامنے آ چکے ہیں،اقبال ٹائون ڈویژن میں بائیس کروڑ روپے کی رقم خردبرد کرنے کا سکینڈل سامنے آیا تھاجبکہ راوی روڈ ڈویژن، سمن آباد، ڈیفنس اور قصور میں بھی مالی غبن کا سکینڈل سامنے آیا تھا۔