قیدیوں کی سزائو ں میں کمی کا طریق کار ،دورانیہ وضع

لاہور( ڈیلی پاکستان آئی لائن) حکومت نے قیدیوں کی سزائوں میں معافی کے حوالے سے اہم فیصلہ کیا ہے جس کے تحت 5 کیٹیگریز میں سزائو ں میں کمی کا طریق کار اور دورانیہ واضح کر دیا گیا ہے۔ ان کیٹیگریز میں سپیشل معافی، اچھے کردار کی معافی، خون عطیہ کرنے کی معافی اورتعلیمی معافی شامل ہیں۔مراسلہ کے مطابق کسی بھی قیدی کی سزا میں معافی ایک تہائی سے زیادہ نہیں ہوگی۔ سزائے موت سے عمر قید میں تبدیل ہونے والے قیدی کم از کم سکیل کے مطابق معافی کے حقدار ہوں گے تاہم وہ قیدی جو 4 ماہ سے کم قید با مشقت کی سزا پائے ہوں معافی کے حق دار نہیں ہوں گے۔معافی کا تعین ڈپٹی سپرنٹنڈنٹ کی جاری کردہ ماہانہ رپورٹ کے مطابق کیا جائے گا۔ دہشتگردی، سنگین جرائم اور غداری کے کیسز میں سزا پر معافی کا اطلاق نہیں ہوگا۔آئی جی جیل خانہ جات نے معافی کے حوالے سے مراسلہ جاری کرتے ہوئے عملدرآمد کا حکم دے دیا ہے۔