قوم کو عمران خان کے خاندان کی قربانی کا بھی ادراک ہے ‘ مسرت جمشید چیمہ

کس کی فرمائش پر بشری بی بی کو جھوٹے کیس میں سزا سنائی گئی وہ کسی سے ڈھکا چھپا نہیں ‘ سینئر رہنما پی ٹی آئی
لاہور( ڈیلی پاکستان آن لائن) پاکستان تحریک انصاف کی سینئر مرکزی رہنما مسرت جمشید چیمہ نے کہا ہے کہ عمران خان ملک میں آئین و قانون کی بالا دستی اور قوم کے تابناک مستقبل کیلئے قید و بند کی صعوبتیں برداشت کر رہے ہیں اور ان کی قربانی ہرگز رائیگاں نہیں جائے گی،بشری بی بی جس جرات و بہادری کے ساتھ جیل کاٹ رہی ہیں اس سے سیاسی مخالفین کے عمران خان کو دبائو میں لانے کے سارے منصوبے دھرے کے دھرے رہ گئے ہیں۔ اپنے بیان میں مسرت جمشید چیمہ نے کہا کہ کس کی فرمائش پر بشری بی بی کو جھوٹے کیس میں سزا سنائی گئی وہ کسی سے ڈھکا چھپا نہیں ، ان شا اللہ وہ وقت دور نہیں جب منصوبہ ساز اور ان کے سہولت کار وں کے چہروں سے نقاب اترے گا ۔ انہوں نے کہا کہ عمران خان تو قوم کے لئے جدوجہد کر ہی رہے تھے ان کے خاندان نے بھی بڑی قربانی دی ہے اور قوم کو اس کا ادراک ہے ۔بشر ی بی بیبھی عمران خان کی طرح پر عزم ہیں اور جھوٹے اور بے بنیاد الزامات کے تحت قید و بند کی صعوبتیں برداشت کرنے کے باوجود ان کی زبان پر کسی طرح کا کوئی شکوہ نہیں جس سے ہم جیسے کارکنوں کے حوصلے بھی بلند ہوتے ہیں۔ انہوں نے کہا کہ اقتدار پر قابض ٹولہ تو کئی سالوں سے عمران خان کی سیاست کو ختم کرنے کے درپے ہے اس کے لئے ان کی اہلیہ گھریلو باپردہ خاتون کو بھی جیل میں ڈالنے کا حربہ آزمایا جا چکا ہے لیکن عمران خان نہ پہلے جھکے تھے اور نہ اب جھکیں گے بلکہ یہ کاوشیں کرنے والوں کو سوائے شرمندگی اور ناکامی کے کچھ نہیں ملے گا۔انہوںنے کہا کہ پیپلز پارٹی والے ایک طرف اقتدار کے مزے لوٹ رہے ہیں اور دوسری طرف ہم حکومت میں شامل نہیں کے بیانات داغ کا عوام کی آنکھوں میں دھول بھی جھونک رہے ہیں ،حالات بتا رہے ہیں کہ آنے والے دنوں میں حکومتی اتحاد کا شیراز ہ بکھرنے جارہا ہے ۔