فوجی عدالتوں سے سویلینز کو سزائیں مسترد

عام شہریوں کیخلاف فوجی عدالتوں میں مقدمہ نہیں چل سکتا’عمر ایوب
اسلام آباد ( ڈیلی پاکستان آن لائن)قومی اسمبلی میں اپوزیشن لیڈر اور پاکستان تحریک انصاف کے رہنما عمر ایوب نے ملٹری کورٹس کی جانب سے سانحہ 9مئی میں ملوث مجرموں کی سزائوں کے فیصلے کو مسترد کرتے ہوئے انصاف کے اصولوں کے منافی قرار دے دیا۔سماجی رابطے کے پلیٹ فارم ایکس پر جاری اپنے خصوصی بیان میں اپوزیشن لیڈر عمر ایوب نے ملٹری کورٹس کے فیصلے پر ردعمل جاری کیا اور کہا کہ پی ٹی آئی کے زیر حراست افراد کو سزائیں انصاف کے اصولوں کے منافی ہیں اور زیر حراست افراد عام شہری ہیں جن کے خلاف فوجی عدالتوں میں مقدمہ نہیں چل سکتا۔اپوزیشن لیڈر نے کہا کہ فوجی عدالتوں سے سویلینز کو سزائیں مسترد کرتے ہیں۔عمر ایوب کا کہنا تھا کہ مسلح افواج ریاست کے انتظامی اختیار کا حصہ ہیں اور ایسے فیصلوں سے آئین کی بنیادی خصوصیت اور طاقت کی تقسیم کی نفی ہوئی ہے۔قبل ازیں فوجی عدالتوں نے سانحہ 9 مئی میں ملوث 25مجرمان کو سزائیں سنائی ہیں اور سزا پانے والوں میں جی ایچ کیو راولپنڈی ، جناح ہاوس لاہور اور میانوالی ایئربیس پر حملے کرنے والے ملزمان شامل ہیں۔مردان ، بنوں ، چکدرہ ، فیصل آباد اور ملتان میں فوجی تنصیبات پر حملوں کے مجرموں کو بھی سزائیں سنائی گئی ہیں۔سزا یافتگان کو اپیل اور دیگر قانونی چارہ جوئی کا حق ہوگا۔