عمران خان پاکستان کو نقصان پہنچانے کیلئے ہر حربہ استعمال کر رہے ہیں، شرجیل میمن

تحریک انصاف کی ایک ٹیم مذاکرات دوسری انٹرنیشنل پریشر ڈویلپ کر رہی ہے، صوبائی وزیر
کراچی(ڈیلی پاکستان آن لائن)سندھ کے سینئر وزیر شرجیل انعام میمن نے کہا ہے کہ عمران خان پاکستان کو نقصان پہنچانے کیلئے ہر قسم کے حربے استعمال کر رہے ہیں، پاکستان کی کوئی سیاسی جماعت اس حد تک نہیں گئی۔کراچی میں پریس کانفرنس کرتے ہوئے شرجیل میمن نے کہا کہ تحریک انصاف کی ایک ٹیم حکومت سے مذاکرات جبکہ دوسری انٹرنیشنل پریشر ڈویلپ کرنے میں مصروف ہے۔انہوں نے کہا کہ آصف زرداری بارہ سال جیل میں رہے لیکن پھر بھی اپنے وطن پر آنچ آنے نہیں دی، ہم بھی نہیں چاہتے کہ کسی سیاسی قیدی کا مقدمہ ملٹری کورٹ میں چلے، عمران خان کے ملٹری کورٹس کے حق میں بیانات موجود ہیں۔ شرجیل میمن نے کہا کہ آج پارہ چنار کے جو حالات ہیں اس کی ذمہ دار نااہل پی ٹی آئی کی حکومت ہے، پی ٹی آئی کی حکومت کے دوران بنوں جیل سے دہشتگرد چھڑوائے گئے۔انہوں نے کہا کہ اسلام آباد کو یرغمال بنانے والے اپنے صوبے میں تو ایک سڑک بھی نہیں کھلوا پا رہے، اس پر کیا عمران خان نے کوئی بیان دیا ہے؟ کیا عمران خان نے حکومت کو کوئی احکامات دیے ہیں۔شرجیل میمن نے کہا کہ کے پی میں ساڑھے تین سال میں ایک بھی کام نہیں کیا گیا، پی ٹی آئی نے بھائی کو بھائی سے لڑوانے کی کوشش کی، کوئی ایک اچھا منصوبہ بتا دیں جو کے پی حکومت نے کیا ہو، نوجوان اپنی آنکھیں کھولیں اور دیکھیں کون کیا کر رہا ہے۔