سیاسی پولرائزیشن معاشرے ،معیشت کیلئے زہر قاتل ہے :پنجاب بار کونسل

لاہور( ڈیلی پاکستان آن لائن)پنجاب بار کونسل کے وائس چیئرمین چودھری بابر وحید نے کہا ہے کہ سیاسی پولرائزیشن معاشرے اور معیشت کیلئے زہر قاتل ہے ،حکومت اور اپوزیشن کو معاملات کے حل کیلئے ایک میز پر بیٹھنا ہوگا ، وکلاء قیادت حالات میں سدھار لانے کیلئے اپنا مثبت کردار ادا کرنے کیلئے تیار ہے ،وکلاء برادری کی فلاح و بہبود کے لئے کوئی کسر اٹھا نہیں رکھی جائے گی،لاہور ہائیکورٹ میں ججز کی تعداد میں اضافہ کیا جانا چاہیے ۔ ان خیالات کا اظہار انہوںنے ملاقات کے لئے آنے والے وکلاء کے وفد سے گفتگو کرتے ہوئے کیا ۔اس موقع پر پنجاب بار کونسل یگزیکٹو کمیٹی کے چیئرمین رائوفضل الرحمن ،سیکر ٹری پنجاب بار کونسل رفاقت علی سوہل،سابق وائس چیئرمین فرحان شہزاد ،کامران بشیر مغل،امجد اقبال خان ،عدیل ہاشمی ،رانا عمیر اور دیگر بھی موجود تھے۔وائس چیئرمین پنجاب بار کونسل چودھری بابر وحید نے کہا کہ کسی کو بھی میں نہ مانوں کی رٹ اور مذاکرات کے دروازے بند نہیں کرنے چاہئیں، سیاست میں تقسیم کو اس حد تک نہیں بڑھانا چاہیے جس سے واپسی کاراستہ ممکن نہ ہو ۔ انہوں نے کہا کہ سیاست اور جمہوریت سے تو مسائل کا حل نکلتا ہے لیکن بد قسمتی سے ہمارے ہاں سیاست نے نئی صورت اختیار کر لی ہے جس کی وجہ سے عوام میں بھی شدید تشویش پائی جاتی ہے ۔