سعودی عرب کے3ارب ڈالر ڈیپازٹ کی مدت میں توسیع پر اظہار تشکر

معیشت میں سدھار ،قرضوں سے نجات کیلئے میثاق معیشت ،سیاسی استحکام نا گزیر ہے:صدر اشرف بھٹی

لاہور( ڈیلی پاکستان آن لائن)آل پاکستان انجمن تاجران کے مرکزی صدر اشرف بھٹی نے سعودی عرب کی جانب سے پاکستان کیلئے 3 ارب ڈالر ڈیپازٹ میں ایک با رپھر توسیع کرنے پر اظہار تشکر کرتے ہوئے کہا ہے کہ سعودی عرب کڑے وقت میں ہمیشہ پاکستان کے ساتھ کھڑا رہاہے ،حکومت معیشت کی بہتری کیلئے اصلاحات کے ساتھ مشکل فیصلے لے رہی ہے لیکن یہ اقدامات سیاسی استحکام کے بغیر نتیجہ خیز نہیں ہو سکتے۔ اپنے بیان میں اشرف بھٹی نے کہا کہ سعودی عرب، چین اور متحدہ عرب امارات مشکل وقت میں ہمیشہ پاکستان کے ساتھ کندھے سے کندھا ملا کر چلے ہیں ، یہ ممالک پاکستان میں بھرپور سرمایہ کاری بھی کر رہے ہیں جس سے پاکستانی معیشت مضبوط ہو رہی ہے ۔ انہوں نے کہا کہ تمام سیاسی جماعتوں سے اپیل ہے کہ ملک کی معیشت میں سدھار لانے اور قرضوں کی دلدل سے باہر نکلنے کیلئے میثاق معیشت اور سیاسی استحکام کے لئے پیشرفت کریں بصورت دیگر پاکستان کی کشتی ایسے ہی ہچکولے کھاتی رہے گی ۔ اشرف بھٹی نے کہا کہ وزیر اعظم شہباز شریف سے اپیل ہے کہ ملک میں کاروبار کے حالات میںبہتری کے لئے تاجروں کو یوٹیلٹی بلز کی مد میں ریلیف دیا جائے ۔