سزائے موت کا ملزم بری

ملزم کیخلاف ٹوبہ ٹیک سنگھ پولیس نے 2018ء میں مقدمہ درج کیا تھا
لاہور (ڈیلی پاکستان آن لائن) لاہور ہائیکورٹ نے سزائے موت کے ملزم عدیل کی اپیل کو منظور کرتے ہوئے بری کردیا۔لاہور ہائیکورٹ کے جسٹس شہرام سرور چوہدری کی سربراہی میں 2 رکنی بینچ نے ملزم عدیل کی اپیل پر سماعت کی۔اس دوران ملزم کی جانب سے عثمان نسیم ایڈووکیٹ نے دلائل دیتے ہوئے کہا کہ گواہوں کی موجودگی موقع پر ثابت نہیں ہوئی۔بعدازاں عدالت نے سزائے موت کے ملزم عدیل کی اپیل کو منظور کرتے ہوئے بری کردیا۔یاد رہے کہ ملزم پر مقتول غلام مرتضی کو قتل کرنے کا الزام ہے، ملزم کو ٹوبہ ٹیک سنگھ عدالت نے 2021ء میں سزائے موت کا حکم سنایا تھا جبکہ ملزم کے خلاف ٹوبہ ٹیک سنگھ پولیس نے 2018ء میں مقدمہ درج کیا تھا۔