ریاست کے خلاف مذموم پراپیگنڈا میں ملوث افراد اب بچ نہیں سکیں گے

وفاقی حکومت نے ملزمان کی شناخت کیلئے جوائنٹ ٹاسک فورس قائم کر دی

اسلام آباد( ڈیلی پاکستان آن لائن) ریاست پاکستان کیخلاف مذموم پراپیگنڈا میں ملوث افراد کی شناخت کیلئے وفاقی سطح پر جوائنٹ ٹاسک فورس کا قیام عمل میں لایا گیا ہے جس کا باضابطہ نوٹیفکیشن بھی جاری کر دیا گیا ۔چیئرمین پی ٹی اے کی سربراہی میں 10 رکنی جوائنٹ ٹاسک فورس میں مختلف اداروں کے افسران شامل کئے گئے ہیں، وزیراعظم کے احکامات کے تحت جوائنٹ ٹاسک فورس کا قیام عمل میں لایا گیا۔حالیہ دنوں میں دہشتگردی کے واقعات کے پیش نظر ریاست پاکستان اور سکیورٹی فورسز کیخلاف گمراہ کن پراپیگنڈا جاری ہے، شرپسند عناصر سکیورٹی فورسز کے حوالے سے گمراہ کن پراپیگنڈا میں ملوث ہیں۔جوائنٹ ٹاسک فورس حالیہ احتجاج کے پیش نظر جھوٹا پراپیگنڈا کرنے والے عناصر کی نشاندہی کرے گی، ٹاسک فورس 10 روز میں سفارشات مرتب کرکے حکومت کو پیش کرے گی۔