روس اور یوکرین کے درمیان مزید 300 قیدیوں کا تبادلہ

متحدہ عرب امارات کی ثالثی سے قیدیوں کے تبادلے کی تعداد2484 تک پہنچ گئی
ابو ظہبی(این این آئی )متحدہ عرب امارات نے روس اور یوکرین کے درمیان جنگی قیدیوں کے نئے تبادلے کے حوالے سے ثالثی کی کوششوں کی کامیابی کا اعلان کیا ہے۔عرب ٹی وی کے مطابق متحدہ عرب امارات کی وزارت خارجہ نے گزشتہ روز بیان میں بتایا کہ کل 300 قیدیوں کا تبادلہ کیا گیا جس میں یوکرین کے 150 اور روس کے 150 قیدی شامل ہیں۔متحدہ عرب امارات کی ثالثی کی کوششوں کے ذریعے روس اور یوکرین کے دوران قیدیوں کے تبادلے کی تعداد2484 تک پہنچ گئی ہے۔ وزارت نے یو ایای کی ثالثی کی کوششوں میں تعاون کیلئے دونوں ممالک کی تعریف کی یہ کوششیں ایک قابل اعتماد ثالث کے طورپر متحدہ عرب امارات کے موقف کو ظاہر کرتی ہیں۔بیان میں متحدہ عرب امارات کی جانب سے یوکرین تنازع کا پرامن حل تلاش کرنے کیلئے تمام کوششیں جاری رکھنے کے عزم کا اعادہ کیا گیا ۔یاد رہے اس سے قبل متحدہ عرب امارات نے دسمبر 2022 کے دوران امریکا اور روس کے قیدیوں کی رہائی میں کردار ادا کیا تھا۔