دھواں چھوڑنے والی گاڑیوں کو18 کروڑ کے جرمانے

لاہور( ڈیلی پاکستان آن لائن)ٹریفک پولیس نے سموگ کے تدارک کیلئے ریکارڈ کاروائیاں کیں اور 18 روز میں 18 کروڑ کے جرمانے کئے گئے ۔ ترجمان کے مطابق ایڈیشنل آئی جی ٹریفک مرزا فاران بیگ کی جانب سے دھواں چھوڑنے والی گاڑیوں کے خلاف سخت کاروائیوں کی ہدایت کی گئی ہے۔رواں ماہ دھواں چھوڑنے والی 93 ہزار سے زائد گاڑیوں کو چالان ٹکٹ جاری کئے گئے ،دھواں چھوڑنے پر 96 گاڑیوں کے فٹنس سرٹیفکیٹ معطل کئے گئے ،63 سے زائد گاڑیوں کے روٹ پرمٹ معطل کئے گئے، دھواں چھوڑنے والی 56 گاڑیوں کے خلاف ایف آئی آرز درج کرائی گئیںجبکہ13 ہزار سے زائد گاڑیوں کو دھواں چھوڑنے پر بند کیا گیا۔ترجمان کے مطابق 17 ہزار سے زائد ریت مٹی سے لوڈڈ آن کورڈ ٹریکٹر ٹرالیاں کو آلودگی کا باعث بننے پر بھاری جرمانے کئے گئے ،دھواں چھوڑنے والی گاڑیوں کو 2000 جرمانہ اور سخت قانونی کاروائی بھی کی جاری ہے ،18روز میں گاڑیوں کو18 کروڑ سے زائد کے جرمانے کئے گئے۔ ایڈیشنل آئی جی ٹریفک مرزا فاران بیگ کے مطابق وزیراعلی پنجاب کے ویژن پر پنجاب کو سموگ فری بنانے کے لیے ٹریفک پولیس کا کردار سب سے اہم ہے،صوبہ بھر میں سموگی وہیکلز کے خلاف ٹریفک پولیس کی ٹیمیں بہترین کام کر رہی ہیں۔ انہوں نے کہا کہ تمام سی ٹی اوز اور ڈی ٹی اوز متحرک ہو کر سموگ فری پنجاب کے لیے کام کریں،سموگ کے تدارک کیلئے حکومتی ہدایات پر سختی سے عمل درامد کروایا جا رہا ہے،گاڑیوں سے نکلنے والا زہریلا دھواں بے تحاشہ بیماریوں اور ماحولیاتی الودگی کا باعث بنتا ہے،ہمیں اپنے ماحول کو بچانے کے لیے گاڑیوں سے نکلنے والے زہریلے دھوئیں کا خاتمہ کرنا ہے۔