دھمکیوں کاسلسلہ اب بند ہونا چاہیے، پی ٹی آئی ملک کو مضبوط ہوتا نہیں دیکھنا چاہتی:عطا تارڑ

سپہ سالار جنرل عاصم منیر ملک کیلئے نیک نیتی رکھتے ہیں، آرمی چیف چاہتے ہیں ملک ترقی کرے:وزیر اطلاعات

اسلام آباد( ڈیلی پاکستان آن لائن )وفاقی وزیر اطلاعات و نشریات عطا اللہ تارڑ نے کہا ہے کہ دھمکیوں کاسلسلہ اب بند ہونا چاہیے، پاکستان تحریک انصاف ملک کو مضبوط ہوتا نہیں دیکھنا چاہتی، وزیراعلی خیبر پختوانخواہ علی امین گنڈاپور نے چند الزامات لگائے، قوم کو کچھ حقائق بتانا ضروری ہیں، غیر ملکی میڈیا کو خیبر پختوانخواہ میں بلا کر گمراہ کن باتیں بتائی جارہی ہیں، انہوں نے غیر ملکی میڈیا کو گمراہ کن حقائق بتائے ، آپ نے 26 نومبر کو بھی آرٹی فیشل انٹیلی جنس سے تصاویر اور ویڈیو بنائیں۔پریس کانفرنس کرتے ہوئے وزیر اطلاعات عطا اللہ تارڑ نے کہا کہ آپ پر اپنے ہی ورکرز نے پتھرا کیا اور پھر گارڈز نے فائرنگ کی جس کی فوٹیج سامنے آگئی ہے، بشری بی بی نے علی امین گنڈاپور پر پتھرا ئوکروایا، علی امین گنڈپورا،بشری بی بی دونوں نے دوڑ لگائی، میرا پھر وہی سوال ہے کہ دوڑ کیوں لگائی؟۔آپ سیاسی طور پر ناکام ہیں،صوبے کو چلانے میں ناکام ہیں، اب غیر ملکی میڈیا کو جیسے مرضی جعلی بریفنگ دیں، آپ نے 9 مئی کو جو کیا قوم کو بھولنے نہیں دیں گے، آپ نے قوم کو بچوں کو اکسایا، باہر سے غیر ملکی عناصر فنڈنگ کرکے فوج کے خلاف مہم چلارہے ہیں، ہم ان کا پورا بندوبست کررہے ہیں ،پیچھے جائیں گے۔انہوںنے کہا کہ یہ لوگوں کو ڈنڈے پڑواتے ہیں اور خود پیچھے سے بھاگ جاتے ہیں، انہوں نے لوگوں کو 9 مئی اور 26 نومبر کیلئے استعمال کیا،علی امین گنڈا پور دھمکیاں لگا رہے ہیں ،اگلی کال پرامن نہیں ہو گی، علی امین گنڈاپور بتائیں ان کی کون سی کال پرامن رہی ہے، آپ جرم کریں گے پھر کریک ڈائون تو ہوگا، آپ میں اتنی ہمت نہیں کہ اگلی کال دے سکیں۔عطا تارڑ نے کہا کہ ان کو تکلیف ہے ملک میں ایک سپہ سالار موجود ہے، سپہ سالار جنرل عاصم منیر ملک کیلئے نیک نیتی رکھتے ہیں، آرمی چیف چاہتے ہیں ملک ترقی کرے، پی ٹی آئی ملک کو مضبوط ہوتا نہیں دیکھنا چاہتی، ان کو باہر سے پیسہ آتا ہے اس لیے بغاوت کرتے ہیں۔پی ٹی آئی فوج کو سیاست میں گھسیٹنا چاہتی ہے،فوجی تنصیبات پرحملہ ہوگا توفوج پیرو ی کرے گی، انہوں نے ادارے کی پراڈکٹس کی مہم چلائی ہے،اگر ادارے کی پراڈکٹس کا بائیکاٹ کرنا تھا تو سب سے پہلے بانی پی ٹی آئی کا کرتے، ادارے کی سے بڑی پراڈکٹ تو عمران خان خود تھے۔