خانہ کعبہ ایک بار پھر ”اللہ اکبر“ کی صداﺅں سے گونج اٹھا

خانہ کعبہ ایک بار پھر ”اللہ اکبر“ کی صداﺅں سے گونج اٹھا

کئی ماہ کی ویرانی کے باعث خانہ کعبہ ایک بار پھر اللہ کے مہمانوں سے آباد ہو گیا

ایس اوپیز پرعمل درآمد کرتے ہوئے عمرہ کے مناسک کی ادائیگی کا آغاز کر دیا گیا

مکہ مکرمہ (ڈیلی پاکستان آن لائن) کئی ماہ کی کرونا ویرانی کے باعث خانہ کعبہ ایک بار پھر اللہ کے مہمانوں سے آباد ہو گیا۔ صحت کے پروٹوکول اور ایس اوپیز پرعمل درآمد کرتے ہوئے عمرہ کے مناسک کی ادائیگی کا آغاز کر دیا گیا ہے۔

مسجد حرام کے دروازے زائرین کے لیے کھول دیے گئے ہیں۔الحرمین الشریفین کی جنرل پریزیڈینسی کی طرف سے جاری کردہ ایک بیان میں کہا گیا ہے کہ اندورن ملک سے عازمین عمرہ قافلوں کی شکل میں مسجد حرام پہنچنا شروع ہو گئے ہیں۔

بیان میں کہا گیا ہے کہ طواف کے لیے دن میں چھ اوقات مقرر کیے گئے ہیں۔ پہلے مرحلے میں صرف 30 فی صد عمرہ زائرین کو اجازت دی گئی ہے۔ پہلے مرحلے میں چھ ہزار فرزندان توحید عمرہ کے فرائض انجام دیں گے۔

گذشتہ ایک ہفتے سے ملک بھر سے عمرہ زائرین کے قافلوں کی آمد کا سلسلہ جاری ہے۔ عمرہ زائرین کو ٹرانسپورٹ کی سہولت کے لیے 200 بسیں تیار کی گئی ہیں۔سعودی پبلک ٹرانسپورٹ کی طرف سے جاری بیان میں کہا گیا ہے کہ ایک بس میں معتمرین کو چار صفوں میں ایک سیٹ چھوٹ کر ایک پر بیٹھنے کی اجازت دی گئی ہے۔ اس طرح ایک بس میں صرف 20 عازمین عمرہ کو سوار ہونے کی اجازت ہو گی۔