حکومت نے یو اے ای میں قید 4700پاکستانیوں کے پاسپورٹ بلاک کر دیئے

متحدہ عرب امارات میں 5ہزار 292پاکستانی مختلف جرائم کے الزامات میں قید ہیں’ذرائع وزارت داخلہ
اسلام آباد ( ڈیلی پاکستان آن لائن ) حکومت پاکستان نے متحدہ عرب امارات (یو اے ای)میں قید 4ہزار 700پاکستانیوں کے پاسپورٹس بلاک کر دیئے ۔ وزارت داخلہ کے ذرائع کے حوالے سے بتایا گیا ہے کہ متحدہ عرب امارات میں 5ہزار 292پاکستانی مختلف جرائم کے الزامات میں قید ہیں۔وفاقی حکومت نے جرائم میں ملوث پاکستانی شہریوں کے پاسپورٹ بلاک کرنے کا فیصلہ کیا، جس کے نتیجے میں یو اے ای میں منشیات کے جرائم میں ملوث 2ہزار 470پاکستانیوں کے پاسپورٹس بلاک کر دیئے گئے۔فراڈ، دھوکا دہی اور جنسی ہراسانی میں ملوث 100پاکستانیوں کے پاسپورٹس بھی بلاک کیے گئے ہیں، جب کہ چوری کے جرائم میں یو اے ای میں قید 704پاکستانیوں کے پاسپورٹ بلاک کیے گئے۔وزارت داخلہ کے ذرائع کے مطابق قتل اور راہزنی میں ملوث 216پاکستانیوں کے پاسپورٹ بلاک کیے جاچکے ہیں، غیر قانونی طور پر یو اے ای میں رہائش پذیر 375پاکستانیوں کے پاسپورٹ بھی بلاک کیے گئے ہیں۔یو اے ای حکام کی جانب سے حکومت پاکستان کو جرائم کی تفصیلات فراہم کی گئی تھیں، جس پر وفاقی وزارت داخلہ نے قانون کے مطابق کارروائی کی۔یاد رہے کہ 2ماہ قبل اکتوبر کے مہینے میں حکومت پاکستان کی جانب سے سعودی جیلوں میں قید ہزاروں پاکستانیوں کے پاسپورٹ بلاک کیے گئے تھے۔