حکومت خام ماربل ،گرینائٹ کی برآمد پر پابندی عائد کرے ‘خادم حسین

ویلیو ایڈڈ مصنوعات ٹائلز اور سلیبس برآمد کی جائیں ‘ڈائریکٹر پاکستان سٹون ڈویلپمنٹ کمپنی
لاہور( ڈیلی پاکستان آن لائن)ڈائریکٹر پاکستان سٹون ڈویلپمنٹ کمپنی ،سینئر نائب صدر فیروز پور بورڈ اور سابقہ ایگزیکٹو ممبر لاہور چیمبر آف کامرس خادم حسین نے وزیراعظم شہباز شریف سے خام ماربل اور گرینائٹ کی برآمد پر پابندی عائد کرنے کی اپیل کرتے ہوئے کہاہے کہ اس کے بجائے ویلیو ایڈڈ مصنوعات ٹائلز اور سلیبس برآمد کی جائیں جس سے ملک کے لئے بڑے پیمانے پر زرمبادلہ کا حصول ممکن ہو سکے گا ۔انہوں نے کہا کہ حکومت گارمنٹس ،ٹیکسٹائل اور اس طرز کے دیگر برآمدی شعبوں کی طرح ماربل اور گرینائٹ کی صنعت کو بھی مختلف مدوں میں ریلیف دے تاکہ عالمی منڈیوں میں حریف ممالک کا مقابلہ کیا جا سکے ۔ماربل اور گرینائٹ کی عالمی سطح پر موثر مارکیٹ کرنے کی ضرورت ہے اس کے لئے عالمی نمائشوں میں شرکت کے لئے مالی اور تکنیکی معاونت سمیت سنگل کنٹری نمائش کے انعقاد کے لئے بھی پیشرفت کی جائے ۔ ماربل اور گرینائٹ کے برآمد کنندگان کو اٹلی سمیت دیگر ممالک کے ویزوں کے حصول میں درپیش رکاوٹیں دور کرنے کے لئے سفارتخانوں کی سطح پر بات چیت کی جائے ۔ وفاقی اور صوبائی حکومت ماربل اور گرینائٹ مینوفیکچررز کی جانب سے مشینری کی خریداری کے لیے بینک فنانسنگ تک رسائی میں بھی مدد فراہم کرے ۔خادم حسین نے مطالبہ کیا کہ صنعتی ترقی اور روزگار کے مواقع پیدا کرنے کے لیے اسٹیٹ بینک شرح سود کو جلد سے جلد سنگل ڈیجٹ میں لائے ۔