جے یو آئی کی مدارس بل منظور نہ ہونے پر اسلام آباد مارچ کی دھمکی

قومی اسمبلی اور سینیٹ سے بل منظور کر کے روکنا بدنیتی پر مبنی ہے’ مولانا عبدلغفور حیدری
اسلام آباد (ڈیلی پاکستان آن لائن)جمعیت علمائے اسلام (ف) کے مرکزی رہنما مولانا عبد الغفور حیدری نے دینی مدارس بل کی منظوری کے لیے وفاقی حکومت کو دی گئی 8دسمبر کی ڈیڈ لائن گزرنے کے بعد اگلے لائحہ عمل سے خبردار کرتے ہوئے دھمکی دی ہے کہ 8دسمبر تک دینی مدارس سے متعلق بل منظور نہ کیا گیا تو اسلام آباد کا رخ کریں گے۔انہوں نے کہا کہحکومت کو دینی مدارس کا بل ہر صورت میں منظور کرنا ہو گا،ہم مذہبی لوگ ہیں نہیں چاہتے کہ اسلام آباد کی طرف مارچ کیا جائے اور ملک بھی اس چیز کا متحمل نہیں ۔قومی اسمبلی اور سینیٹ سے بل منظور کر کے روکنا بدنیتی پر مبنی ہے۔ مولانا عبدلغفور حیدری نے کہا کہ یہ جمعیت علما اسلام اور وفاق المدارس کابل نہیں بلکہ کے تمام تنظیمات مدارس کا ہے ۔ خیال رہے کہ دینی مدارس سے متعلق بل اسمبلی سے منظوری کے بعد صدر آصف زرداری کے پاس توثیق کے لیے پہنچا تھا تاہم انہوں نے بل واپس بھیجوا دیا تھا۔ جس پر سربراہ جے یو آئی مولانا فضل الرحمان بھی صدر مملکت آصف علی زرداری سے نالاں ہیں۔اس معاملے پر بلاول بھٹو نے بھی مولانا فضل الرحمان سے ملاقات کی تھی لیکن تاحال معاملہ کھٹائی کا شکار نظر آتا ہے۔