بھارت،ہوٹلوں، ریسٹورنٹس اور تقاریب میں بیف پر پابندی عائد

اب کسی بھی ریسٹورنٹ یا ہوٹل میں بیف (گائے یا بھینس کا گوشت)نہیں ملے گا،وزیراعلیٰ آسام
نئی دہلی (ڈیلی پاکستان آن لائن)بھارت کی ریاست آسام میں حکومت نے بیف (گائے یا بھینس کا گوشت)سے متعلق اہم فیصلہ کیا ہے۔بھارتی میڈیا رپورٹس کے مطابق ریاست کے چیف منسٹر ہیمنت بسوا سرما نے حکم جاری کرتے ہوئے کہا کہ اب کسی بھی ریسٹورنٹ یا ہوٹل میں بیف (گائے یا بھینس کا گوشت)نہیں ملے گا اور ساتھ ہی اسے عوامی تقریب یا کسی عوامی جگہ پر بھی کھانے کی اجازت نہیں ہوگی۔دہلی میں آسام حکومت کی کابینہ کی میٹنگ کا انعقاد کیا گیا، جس میں کئی وزرا ویڈیو کانفرنسگ کے ذریعے شامل ہوئے۔ اس موقع پر بیف پر مکمل پابندی لگانے سے متعلق سخت فیصلہ کیا گیا۔ہیمنت بسوا سرما کا کہنا تھا کہ ہم آسام میں 3 سال قبل گاو کشی روکنے کے لیے قانون لائے تھے۔ اس قانون کے باعث گاو کشی کو روکنے میں بڑی مدد ملی ہے۔انہوں نے کہا کہ اب ہم نے فیصلہ کیا ہے کہ آسام میں کسی بھی ریسٹورنٹ یا ہوٹل میں بیف (گائے یا بھینس کا گوشت) نہیں رکھا جائے گا۔اس کے علاوہ کسی عوامی تقریب یا عوامی جگہ پر بھی بیف استعمال نہیں کیا جائے گا، اس لیے آج سے ہم نے ہوٹل، ریسٹورنٹ اور عوامی مقامات پر بیف کے استعمال کو پوری طرح سے بند کرنے کا فیصلہ کیا ہے۔