بلاول بھٹو کی مولانا فضل الرحمان سے ملاقات

جے یو آئی سربراہ نے مدارس رجسٹریشن بل پر صدر مملکت کے دستخط نہ ہونے پر تشویش سے آگاہ کیا

اسلام آباد( ڈیلی پاکستان آن لائن )پاکستان پیپلز پارٹی کے چیئرمین بلاول بھٹو زرداری اورجمعیت علمائے اسلام (ف) کے سربراہ مولانا فضل الرحمان کے درمیان ملاقات ہوئی ہے جس میں مولانا فضل الرحمن نے مدارس رجسٹریشن بل پر صدر مملکت کے دستخط نہ ہونے پر تشویش کا اظہار کیا۔بلاول بھٹو زرداری وفد کے ہمراہ ملاقات کے لئے مولانا فضل الرحمان کی رہائشگاہ پہنچے۔ملاقات میں ملکی سیاسی صورتحال سمیت دیگر امور پر تبادلہ خیال کیا گیا۔ملاقات میں مولانا فضل الرحمان نے مدارس رجسٹریشن بل پر صدر مملکت آصف علی زرداری کے دستخط نہ ہونے پر تشویش کا اظہار کیا اور کہا کہ مدارس رجسٹریشن بل پر دونوں ایوانوں سے منظوری کے باوجود صدر کے دستخط کیوں نہیں ہوئے۔بلاول بھٹو زرداری نے مولانا فضل الرحمان کو یقین دہانی کرائی کہ وہ مدارس رجسٹریشن بل پردستخط نہ ہونے پرحکومت سے بات کریں گے۔