بانی پی ٹی آئی ،بشری بی بی کی ناکام بغاوت کے تمام ثبوت سامنے آگئے :عظمی بخاری

جنہوں نے انقلاب لانا تھا اب وہ ایک دوسرے پر ٹائوٹ ،جاسوس کے الزامات لگا رہے ہیں

لاہور(ڈیلی پاکستان آن لائن )صوبائی وزیر اطلاعات عظمی بخاری نے کہا ہے کہ بانی پی ٹی آئی عمران خان اور بشری بی بی کی ناکام بغاوت کے تمام ثبوت سامنے آگئے،آئی جی اسلام آباد، سیکرٹری داخلہ اور ڈی پی او اٹک کی پریس کانفرنسز ناقابل تردید شواہد ہیں۔ اپنے بیان میں انہوں نے کہا کہ سکیورٹی فورسز پر حملوں کیلئے غیرملکیوں کو احتجاج میں لایا گیا۔احتجاج میں شریک افراد تربیت یافتہ اور تخریب کاری کے ماہر تھے، گرفتار افراد کی اکثریت کا پاکستان میں کوئی ریکارڈ ہی نہیں، خیبر پختوانخواہ حکومت کے پاس دہشتگردوں سے لڑنے کیلئے اسلحہ نہیں لیکن فیڈریشن پر چڑھائی کیلئے جدید اسلحہ ہے۔انہوں نے کہا کہ لاشوں کی سیاست کرنے والے اب تک درجن بھر بیانات تبدیل کر چکے ہیں۔صوبائی وزیر عظمی بخاری نے مزید کہا کہ فتنہ پارٹی کا سوشل میڈیا ہی اس کیلئے وبال جان بن چکا ہے، اب وقت آگیا ہے پاکستان میں سوشل میڈیا کو ہر سطح پر ریگولرائز کیا جائے، جنہوں نے انقلاب لانا تھا اب وہ ایک دوسرے پر ٹائوٹ اور جاسوس کے الزامات لگا رہے ہیں۔