ایک بار پھر اسرائیل کی دمشق کے المزہ ملٹری ایئرپورٹ پر بمباری

ہوائی اڈوں، گوداموں، طیاروں کے سکواڈرن، ریڈار، فوجی سگنل سٹیشن کونشانہ بنایاگیا
دمشق(ڈیلی پاکستان آن لائن) شام کے مختلف علاقوں پر سینکڑوں حملوں کے بعد اسرائیل نے دارالحکومت دمشق کے المزہ فوجی ہوائی اڈے پر دوبارہ بمباری کردی۔عرب ٹی وی کے مطابق اسرائیلی فضائیہ نے گزشتہ دنوں متعدد بار بمباری کے بعد دارالحکومت کے جنوب مغرب میں واقع المزہ ملٹری ایئرپورٹ پر پھر دھاوا بول دیا۔ اسرائیلی بمباری میں ہوائی اڈوں، گوداموں، طیاروں کے سکواڈرن، ریڈار، فوجی سگنل سٹیشن، ہتھیاروں اور گولہ بارود کے ڈپو، سائنسی تحقیقی مراکز اور فضائی دفاعی نظام کو بھی نشانہ بنایا گیا۔اسرائیل نے ملک کے شمال مغرب میں واقع اللاذقہ بندرگاہ میں ایک فضائی دفاعی تنصیب اور جنگی جہازوں کو بھی نشانہ بنایا۔