ایف بی آر کی نئی پاس ورڈ تبدیلی پالیسی پر ٹیکس دہندگان کے تحفظات دور کیے جائیں’لاہور چیمبر

ٹیکس دہندگان کے لیے مسائل پیدا ہونے ،آئرس سسٹم میں بھی تکنیکی پیچیدگیاں پیدا ہونے کا اندیشہ ہے
لاہور (ڈیلی پاکستان آن لائن) لاہور چیمبر آف کامرس اینڈ انڈسٹری نے فیڈرل بورڈ آف ریونیو پر زور دیا ہے کہ نئی پاسورڈ تبدیلی پالیسی پر نظر ثانی کرے جس کے تحت رجسٹرڈ ٹیکس دہندگان کو ہر دو ماہ بعد اپنے پاس ورڈ تبدیل کرنے کی ہدایت دی گئی ہے۔لاہور چیمبر کے صدر میاں ابوذر شاد نے چیئرمین ایف بی آر راشد محمود لانگڑیال کے نام خط میں کہا کہ اس سے نہ صرف ٹیکس دہندگان کے لیے مسائل پیدا ہونے بلکہ آئرس سسٹم میں بھی تکنیکی پیچیدگیاں پیدا ہونے کا اندیشہ ہے۔ میاں ابوذر شاد نے کہا کہ اگرچہ آن لائن لین دین کی سیکیورٹی اور ٹیکس دہندگان کی حساس معلومات کا تحفظ یقینی بنانا ضروری ہے لیکن بار بار پاس ورڈ تبدیل کرنے کی شرط ٹیکس دہندگان ٹیکس دہندگان کے لیے مسائل پیدا کرے گی جو پہلے ہی آئرس سسٹم کی پیچیدگیوں سے نبرد آزما ہیں۔ لاہور چیمبر کے صدر نے مزید کہا کہ بہت سے چھوٹے کاروباری ادارے آئرس سسٹم کو سمجھنے میں مشکلات کا سامنا کررہے ہیں، ان کے پاس تکنیکی مہارت یا وسائل کی کمی ہے جس کی وجہ سے وہ بار بار پاس ورڈ تبدیل نہیں کرسکیں گے۔ انہوں نے کہا کہ کاروباری شعبہ کو پہلے ہی بہت سے مسائل کا سامنا ہے ، ایسے میں بار بار پاس ورڈ تبدیل کرنے کی شرط ایک اور بوجھ ثابت ہوگی جس کی وجہ سے انہیں ٹیکس فائلنگ اور دیگر امور میں سخت دشواریا ںپیش آئیں گی۔ میاں ابوذر شاد نے ایک اور تشویشناک پہلو کی نشاندہی کرتے ہوئے کہا کہ اس سے آئرس سسٹم پر بوجھ بڑھ سکتا ہے جس سے ٹیکس فائلنگ کے عمل میں رکاوٹ پیدا ہوگی۔ صدر لاہور چیمبر نے ایف بی آر پر زور دیا کہ وہ اس پالیسی پر نظر ثانی کرے اور متبادل حفاظتی اقدامات تلاش کرے جو معلومات کا تحفظ یقینی بنائیں لیکن ٹیکس دہندگان پر غیر ضروری بوجھ نہ ڈالیں۔ انہوں نے تجویز پیش کی کہ ایف بی آر دومراحل میں تصدیق (ٹو فیکٹر آتھنٹیکیشن) یا مشکوک سرگرمیوں کا پتہ لگانے کے لیے نگرانی کے نظام کو بہتر بنانے پر غور کرے۔ یہ اقدامات آئرس سسٹم کو بار بار پاس ورڈ تبدیل کیے بغیر مطلوبہ سیکیورٹی فراہم کر سکتے ہیں۔ انہوں نے کہا کہ ٹیکس دہندگان کو ایسی پالیسیوں کے ذریعے پریشان نہیں کرنا چاہیے ۔ کسی بھی نئی اقدام کو ایسے انداز میں ترتیب دیا جائے جو کاروباروں کو سپورٹ کرے، ان کی ترقی میں رکاوٹ نہ بنے اور پہلے سے موجود آپریشنل چیلنجز میں اضافہ نہ کرے۔میاں ابوذر شاد نے توقع ظاہر کی کہ چیئرمین ایف بی آر پاس ورڈ تبدیلی کی پالیسی پر نظرثانی کریں گے اور ٹیکس دہندگان کے لیے سازگار متبادل اقدامات پر غور کریں گے۔