ایف بی آر نان ریذنٹ کو 7ای کے نوٹسز بند کرے ‘طارق محمود میو

فیک اینڈ فلائنگ انوائسز پر بغیر تحقیق مقدمے کا اندراج یا گرفتاری نہ کی جائے’ سینئر ممبر لاہور ٹیکس بار
لاہور( ڈیلی پاکستان آن لائن)لاہور ٹیکس بار کے سینئر ممبر سابق چیئرمین سیلز ٹیکس ریفنڈز کمیٹی طارق محمود میونے فیڈرل بورڈ آف ریو نیو نان ریذنٹ کو 7ای کے نوٹسز بند کرے ، ناروا سلوک کی وجہ سے 32ارب ڈالر سے اوپر جانے والی ترسیلات زر تیزی کے ساتھ نیچے آ رہی ہیںجو کہ لمحہ فکریہ ہے،فیک اینڈ فلائنگ انوائسز پر بغیر تحقیق مقدمے کا اندراج یا گرفتاری نہ کی جائے۔ان خیالات کا اظہار انہوں نے ” اوورسیز پاکستانی معیشت کے لئے نا گزیر ” کے موضوع پر مذاکرے سے خطاب کرتے ہوئے کیا۔اس موقع پرعرفان خان،ارشد قصوری ،آس محمد،محمد ندیم،فرحان خان،عبدالحق بکرم خاں،محمد عارف،محمد دلاور دیگر بھی موجود تھے۔ انہوں نے کہا کہ ۔پاکستان 7ارب ڈالر کے پروگرام کے لیے آئی ایم ایف کی ہر جائز ناجائز شرط کو قبول کرتا ہے لیکن جو اوورسیز پاکستانی بغیر سود اور شرائط کے سالانہ اربوں ڈالر بھجواتے ہیں ان کے پاکستان میں بچے اور نہ ہی جائیدادیں محفوظ ہیں۔انہوں نے کہا کہ جو بیرون ممالک کی کمائی سے پاکستان میں پراپرٹی خرید رہے ہیں یا خریدی ہوئی ہیں انہیں بھی ایف بی آر 7ای کے نوٹسز جاری کر رہا ہے ،ایف بی آر کے افسران انہیں ذاتی حیثیت میں طلب کرتے ہیں جبکہ انہیں معلوم ہے کہ مذکورہ شخص ملک سے باہر ہے اوروہ نہیں آسکتا، اس کے لئے اس کے رشتہ داروںکو بلیک میل کیا جاتا ہے جس کی وجہ سے اوورسیز پاکستانی خوفزدہ ہو رہے ہیں ،حالانکہ ان کی پریشانی ریاست کی پریشانی ہونی چاہیے اور ان کے مسائل حل کرنا حکومت کی اولین ترجیحات ہونا چاہیے تاکہ وہ پر اعتماد ہو کر زیادہ سے زیادہ ترسیلات پاکستان بھیجیں اور پاکستان کو آئی ایم ایف سے قرضہ نہ لینا پڑے ۔اس موقع پر دیگر مقررین نے بھی خطاب کیا اور اپنی تجاویز دیں۔