اڈیالہ جیل میں قید پی ٹی آئی کے 200کارکنوں کو لاہورکیسز میں شامل تفتیش کرنے کی درخواست منظور

انسداد دہشتگردی عدالت نے پی ٹی آئی کارکنوں کو پنجاب پولیس کے حوالے کرنے کی درخواست مسترد کردی
لاہور (ڈیلی پاکستان آن لائن) انسداد دہشت گردی عدالت لاہور نے اڈیالہ جیل میں قید پی ٹی آئی کے 200کارکنوں کو لاہور کیسز میں شامل تفتیش کرنے کی درخواستیں منظور کرلیں۔انسداد دہشت گردی عدالت کے جج امجد علی شاہ نے درخواستوں کی سماعت کی۔ عدالت نے گرفتار 200پی ٹی آئی کارکنوں کو لاہور پولیس کے حوالے کرنے کی درخواستیں مسترد جبکہ ان کارکنوں کو لاہور کیسز میں شامل تفتیش کرنے کی درخواستیں منظور کرلیں۔ عدالت نے کہا کہ لاہور پولیس صرف اڈیالہ جیل میں ان کارکنوں سے تفتیش کرسکتی ہے۔ لاہور پولیس نے 3تھانوں میں درج 9مئی قبل کے مقدمات کی تفتیش درخواستیں دائرکی تھی۔ لاہور پولیس پی ٹی آئی کارکنوں کو تفتیش کے لیے اڈیالہ جیل سے لاہور لے جانا چاہتی تھی۔لاہور پولیس آڈر ملتے ہی تفتیش شروع کردے گی۔ شامل تفتیش کرنے اور حوالگی درخواست میں تحریک انصاف کا کوئی مرکزی رہنما شامل نہیں ہے۔