اسرائیل اور حماس کے درمیان عنقریب جنگ بندی معاہدے کا امکان

امریکہ، قطر اور مصر کے اعلی عہدیداروں نے ثالثی کی کوششیں دوبارہ شروع کردیں
دوحہ (این این آئی ) اگلے 10 روز میں اسرائیل اور حماس کے درمیان غزہ کی پٹی میں جنگ بندی کا معاہدہ طے پا سکتا ہے، یہ انکشاف اسرائیلی ذمہ داران کی جانب سے کیا گیا ہے۔غیر ملکی خبر رساں ادارے کی رپورٹ کے مطابق 14 ماہ کی رکاوٹوں کے بعد اسرائیل اور حماس جنگ بندی کے معاہدے کے قریب پہنچ رہے ہیں۔ امریکہ، قطر اور مصر کے اعلی عہدیداروں نے حالیہ ہفتوں میں اپنی ثالثی کی کوششیں دوبارہ شروع کردی ہیں جبکہ فریقین کی جانب سے بھی معاہدے کو مکمل کرنے پر رضامندی کا اظہار کیا ہے۔اس حوالے سے حماس حکام کا کہنا تھا کہ وہ اسرائیلی فوج کے غزہ سے انخلا کے وقت اپنے روئیے میں مزید لچک دکھانے کے لیے تیار ہیں جبکہ اسرائیل کے وزیر دفاع اسرائیل کاٹز کا کہناتھا کہ فریقین معاہدہ سے قبل ہی بہت زیادہ قریب ہیں۔تاہم تمام فریقین کے حکام نے خبردار کیا کہ ابھی کچھ اہم تفصیلات طے کرنا باقی ہیں لیکن وہ عمومی طور پر ایک امید محسوس کر رہے ہیں جو کئی مہینوں سے غائب تھی۔ذرائع کا کہنا تھا کہ یہ مثبت پیش رفت کئی عوامل کا نتیجہ معلوم ہوتی ہے، جنگ کے دوران اسرائیل نے حماس کو کافی نقصان پہنچایا ہے۔ذرائع کا کہنا تھا کہ امریکہ میں رخصت ہونے والی بائیڈن انتظامیہ اور صدر منتخب ڈونلڈ ٹرمپ کی آنے والی انتظامیہ، دونوں نے اشارہ دیا ہے کہ وہ 20 جنوری کی تقریب حلف برداری سے قبل معاہدہ مکمل ہوتا دیکھنا چاہتے ہیں۔رپورٹ میں بتایا گیا ہے کہ حماس تنظیم اسرائیل کے مطالبے سے کم سے کم تعداد میں یرغمالی رہا کرنا چاہتی ہے جب کہ اسرائیل کسی بھی قسم کی رعایت دینے کے لیے تیار نہیں ہے۔