ازخود ریٹائرمنٹ لینے والوں کی پنشن میں کٹوتی ہو گی

تین طرز کی پنشن میں سالانہ اضافہ بھی ختم کیا گیا

لاہور( ڈیلی پاکستان آن لائن)محکمہ خزانہ پنجاب نے پنشن رولز میں ترامیم کر دی گئیں ، ازخود ریٹائرمنٹ لینے والوں کی پنشن میں بھی کٹوتی ہو گی۔سیکرٹری خزانہ مجاہد شیر دل نے تمام انتظامی سیکرٹریزاور سربراہوں کو مراسلہ ارسال کر دیا۔جس کے مطابق پنجاب کے سرکاری ملازمین کیلئے پنشن میں سالانہ اضافہ ختم کر دیا گیا ۔پنجاب کے محکمہ خزانہ نے تین طرز کی پنشن میں سالانہ اضافہ ختم کردیا ، پنشن میں اضافے پر بندش کا آغاز 2دسمبر 2024سے ریٹائر ہونے والے سرکاری ملازمین پر ہو گا، محکمہ خزانہ کے 2015 میں جاری مراسلہ کے پیراگراف ون کے تحت جاری پنشن میں اضافہ جبکہ 2011 میں جاری کردہ مراسلہ کے پیراگراف ٹو کے تحت جاری اضافہ بھی ختم کردیا گیا۔اسی طرح محکمہ خزانہ کے2022 میں جاری لیٹر کے پیرا گراف ون کے تحت جاری پنشن میں اضافہ ختم کردیا گیا۔ سیکرٹری خزانہ نے مراسلے میں ہدایت کی ہے کہ تمام محکمے اور ادارے 2 دسمبر2024 کے نئے مراسلے کے تحت پنشن میں اضافہ روکنے کیلئے دستاویزی اقدامات کریں۔ محکمہ خزانہ پنجاب کے مطابق ازخود ریٹائرمنٹ لینے والوں کی پنشن میں بھی کٹوتی ہو گی۔جلد ریٹائرمنٹ لینے والے 59 سالہ شخص کی پنشن میں 2 فیصد ، جلد ریٹائرمنٹ لینے والے 58 سالہ شخص کی پنشن میں 4 فیصد ،جلد ریٹائرمنٹ لینے والے 57 سالہ شخص کی پنشن میں 6 فیصد اور 56 سالہ شخص کی پنشن میں 8 فیصد کمی ہو گی۔اسی طرح جلد ریٹائرمنٹ لینے والے 55 سالہ شخص کی پنشن میں 10 فیصد کمی ہو گی۔