ازبک سفیر کا کارپٹ ایسوسی ایشن کا دورہ ——ازبکستان میں سنگل کنٹری نمائشوں کاانعقاد کرایا جائے: چیئرمین عتیق الرحمان

لاہور(ڈیلی پاکستان آن لائن) پاکستان میں ازبکستان کے سفیر علی شیر توقتا یف نے پاکستان کارپٹ مینو فیکچررز اینڈ ایکسپورٹرز ایسوسی ایشن کا دورہ کیا ۔ اس موقع پر پاکستان کے ہاتھ سے بنے قالینوں کی صنعت کی برآمدات سمیت باہمی تجارت کے فروغ کے حوالے سے تفصیلی تبادلہ خیال کیا گیا ۔ اس موقع پر ٹریڈ قونصلر بخرم یوسوپوو اور دیگر بھی ان کے ہمراہ تھے ۔ پیٹرن انچیف عبد اللطیف ملک، چیئرمین میاں عتیق الرحمان، وائس چیئرمین ریاض احمد، کارپٹ ٹریننگ انسٹی ٹیوٹ کے چیئر پرسن اعجاز الرحمان ، سعید خان ، قمر ضیائ،شیخ عامر خالد، سعد الرحمان، فیصل سعید خان سمیت دیگر بھی موجود تھے۔ ازبکستان کے سفیر علی شیر توقتایوف نے تاشقند سے لاہور کے لئے براہ راست پرواز کو پاک ازبک تعلقات میں ایک تاریخی پیشرفت قرار دیتے ہوئے کہا کہ اس سے دونوں ممالک کے تجارتی اور ثقافتی روابط کو مزید فروغ ملے گا۔ازبکستان کی 40ملین کی آبادی ہے جبکہ ہماری جی ڈی پی کی 6سے7فیصد سالانہ گروتھ ہے ۔ پاکستان کی وزارت تجارت سے بہت سے معاملات پر بات چیت جاری ہے ،دونوں ممالک کے درمیان بہت سے شعبوں میں تعاون کو فروغ دینے کے وسیع امکانات موجود ہیں اور جلد ہی دوطرفہ تجارت نئی بلندیوں کو چھوئے گی۔ پی سی ایم ای اے کے چیئرمین میاں عتیق الرحمان اور وائس چیئرمین ریاض احمد نے ازبکستان کے سفیر اور ہمراہ آنے والے وفد کو خوش آمدید کہتے ہوئے ہاتھ سے بنے قالینوں کو متعارف کرانے کے لئے ازبکستان میں سنگل کنٹری نمائشوں کاانعقاد اور اس کے لئے بھرپور معاونت فراہم کی جائے ،ان نمائشوں کے لئے جانے والے قالینوں کو مقامی مارکیٹ میں بھی فروخت کرنے کی اجازت ہونی چاہیے ۔ پاکستان سے ہاتھ سے بنے قالین منگوانے پر درآمدی ٹیرف کو کم کیا جائے تاکہ اس شعبے میں تجارت کی راہ کو ہموار کیا جا سکے۔ انہوں نے کہا کہ ہماری تجویز ہے کہ اس شراکت داری کے ذریعے ہر چھ ماہ بعد سنگل کنٹری نمائشوں کا انعقاد کیا جائے جس سے دوطرفہ تجارت اور ثقافتی تبادلے کو فروغ ملے گا ۔ انہوں نے کہا کہ ہم باہمی ترقی کے فروغ کے لیے پرعزم ہے اور ہمیں یقین ہے کہ آپ کے تعاون کے ساتھ دونوں ممالک تجارت کی مکمل صلاحیت کو اجاگر کر سکتے ہیں۔دونوں ممالک برآمدات کو فروغ دیں اور ایسے پائیدار اقدامات کریں جو دونوں ممالک کے لیے فائدہ مند ہوں۔ازبکستان کے ٹریڈ قونصلر بخرم یوسوپوو نے کہا کہ ازبکستان میں بھی ہاتھ سے بنے قالینوں کی صنعت ہے لیکن ہم حجم کے اعتبار سے پاکستان کی صنعت کے تجربات سے بہت کچھ سیکھ سکتے ہیں ، ہم چاہتے ہیں کہ اس میں جوائنٹ ونچر کیا جائے ۔ انہوں نے پاکستان کارپٹ مینو فیکچررز اینڈ ایکسپورٹرز ایسوسی ایشن کے ذمہ داران سے کہا کہ وہ ایک وفد تیار کریں جن کی ازبکستان کے قالینوں کے پروڈیوسرز سے ملاقات کا اہتمام کیا جائے ۔ اس موقع پر پاکستان کارپٹ مینو فیکچررز اینڈ ایکسپورٹرز ایسوسی ایشن کی جانب سے ازبکستان کے سفیر کو قالین کا تحفہ اور خصوصی شیلڈ بھی پیش کی گئی جبکہ ازبک سفیرعلی شیر توقتایف نے بھی چیئرمین میاں عتیق الرحمان کو خصوصی شیلڈ پیش کی ۔