آٹے کیلئے قطار میں کھڑے فلسطینیوں پر اسرائیل کا حملہ، مزید 50شہید

ایک ہسپتال میں بجلی کی بندش سے 100 سے زائد مریضوں کی جانوں کو خطرہ ہے،وزارت صحت
تل ابیب (ڈیلی پاکستان آن لائن)اسرائیل نے غزہ میں آٹے کی تقسیم کے دوران نہتے شہریوں پر حملہ کر دیا۔میڈیارپورٹس کے مطابق غزہ میں اسرائیل کے تازہ حملوں میں خواتین اور بچوں سمیت کم از کم 50 فلسطینی شہید ہو گئے۔ صحت کے حکام کا کہنا تھا کہ محصور علاقے کے شمال میں واقع ایک اسپتال میں بجلی کی بندش سے 100 سے زائد مریضوں کی جانوں کو خطرہ ہے۔غزہ کی وزارت صحت نے کہا کہ گزشتہ روز 50 افراد شہید اور 84 دیگر زخمی ہوئے جب کہ اسرائیلی فورسز نے علاقے میں تین مقامات پر “قتل عام کیا۔ذرائع نے بتایا کہ شمالی غزہ میں جبالیہ پناہ گزین کیمپ میں اسرائیلی ڈرون حملے میں تین افراد شہید ہو گئے۔الجزیرہ کے ہانی محمود نے غزہ کے وسطی دیر البلاح سے رپورٹنگ کرتے ہوئے کہا کہ(متاثرین)اپنے پڑوس میں خوراک کی تلاش میں اپنے گھر سے نکلنے کی کوشش کر رہے تھے جب انہیں ڈرون نے نشانہ بنایا۔