آخری کارڈ اب بھی میرے پاس ،ابھی استعمال نہیں کروں گا: عمران خان

اسلام آباد میں جو کارروائی کی گئی، وہ سانحہ لال مسجد سے بھی بڑا سانحہ کردیا گیا

بانی پی ٹی آئی کی ہمشیرہ علیمہ خان نے عمران خان کی گفتگو کے حوالے سے آگاہ کیا

راولپنڈی(ڈیلی پاکستان آن لائن)سابق وزیراعظم اور پاکستان تحریک انصاف کے بانی چیئرمین عمران خان نے دعوی کیا ہے کہ ایک آخری کارڈ اب بھی میرے پاس ہے جسے وہ ابھی استعمال نہیں کریں گے۔بانی پی ٹی آئی کی ہمشیرہ علیمہ خان نے اڈیالہ جیل کے باہر میڈیا سے گفتگو کرتے ہوئے بتایا کہ عمران خان کی صحت کے حوالے سے کافی قیاس آرائیاں ہو رہی تھیں، جب ہم نے انہیں یہ بتایا تو اس پر سابق وزیراعظم مسکرائے اور کہا کہ کیا باتیں کر رہے ہو، میری صحت بالکل ٹھیک ہے، میں ورزش بھی کر رہا تھا، لیکن انہوں نے مجھے 40 سے 50 گھنٹوں کے لیے بند کردیا تھا، اخبار اور پی ٹی وی تک رسائی بھی بند کردی تھی۔علیمہ خان نے بتایا کہ ہم نے عمران خان کو ہونے والی کافی چیزوں کے بارے میں بتایا، جو سانحہ ہوا جسے ہم اسلام آباد قتل عام کہتے ہیں اس کے بارے میں معلومات دیں، تفصیلات دیں تو اس کے بارے میں عمران خان کافی صدمے میں تھے، وہ بار بار پوچھ رہے تھے کہ کیا بات کر رہے ہو، ان کو بتایا کہ 10 سے 12 اموات کے اعدادوشمار آرہے ہیںکیونکہ لوگ لاپتہ ہیں یا گرفتار ہیں، یہ واضح نہیں ہے، لوگ اپنے رشتے داروں کو جیلوں میں ڈھونڈتے پھر رہے ہیں، لاشیں لاپتا ہیں۔علیمہ خان نے بتایا کہ عمران خان نے کہا کہ ہسپتالوں میں جائیں، ہم نے کہا کہ اگر لوگ ہسپتالوں میں جاتے ہیں تو انہیں اٹھالیا جاتا ہے، انہیں دھمکیاں دی جا رہی ہیں، عمران خان نے وہاں موجود وکلا ء کو کہا کہ سب سے پہلے ایف آئی آر وزیراعظم شہباز شریف اور وزیر داخلہ محسن نقوی کے خلاف درج کرائیں۔علیمہ خان نے بتایا کہ عمران خان نے کہا کہ اسلام آباد میں جو کارروائی کی گئی، وہ سانحہ لال مسجد سے بھی بڑا سانحہ انہوں نے کردیا ہے، 71 میں یحی خان نے کیا، اس کے بعد اکبر بگٹی کے ساتھ سانحہ کیا گیا، آپ سمجھتے ہیں کہ بندہ ختم کردیں تو چین آجائے گا، اس چیز کو بلوچستان میں آج تک بھلایا نہیں گیا، اس طرح کی کارروائی سے غصہ، رنجشیں ختم نہیں ہوتیں، اس سے غصہ بڑھے گا، اس وقت غصہ بہت زیادہ بڑھے گا۔علیمہ خان کے مطابق عمران خان کا کہنا تھا کہ 9 مئی کے بعد لوگ صدمے اور خوف میں تھے، 8 فروری کے انتخاب کے بعد ووٹ سے لوگوں کو پتا چلا کہ جمہوریت میں ہمارا حق ہے، جب لوگوں کا حق چھینا گیا تو اس پر لوگوں کو غصہ ہے، اب کیے جانے والے ظلم پر غصہ ہے، بھول جائیں کہ لوگ ظلم سہیں گے، وہ ظلم کو کبھی نہیں بھولیں گے۔علیمہ خان نے بتایا کہ عمران خان نے کہا ہے کہ ایک آخری کارڈ ہے وہ میرے پاس ہے، اس کا کسی کو نہ بتائوں گا، نہ پتا چلے گا لیکن وہ میرے پاس ہے، وہ ابھی استعمال نہیں ہوگا۔عمران خان نے اپنی بات کو جاری رکھتے ہوئے کہا کہ ہم نے ابھی عدالتوں میں جانا ہے، سپریم کورٹ میں جانا ہے، عالمی اداروں کے پاس انسانی حقوق کی پامالی کی رپورٹس، اس طرح کی چیز دنیا میں نہیں دیکھی گئی، آپ چھپا نہیں سکیں گے، یہ سب کچھ باہر آئے گا، ہم اس کی پیروی کریں گے۔عمران خان کا کہنا تھا کہ میں اپنے لوگوں کو ہدایت کروں گا کہ اس کو مقامی سطح پر اور عالمی سطح پر بھرپور طرح سے اجاگر کریں۔